Сеҥымаш да сай илыш верч!
Чаманен каласыман, Украиныште эртыше спецоперацийыште самырык, ончыкылык верч кумылын, илышым чаманыде кредалше эргына, пелашна, патырна-влак ӱмыр лугыч лийыт.
Эртыше кечылаште Марий Элыште эше кок патырым пытартыш корныш ужатеныт. Иктыже Йошкар-Ола гыч чолга самырык еҥ Андрей Сорокин, а весыже – Волжский район гыч Александр Захаров.
Ача-аван чонешышт тыгай йомдарымаш ӱмырешлан кугу сусырым кода. Чытымашым да пеҥгыдылыкым нунылан.
Александр Захаров колымыж деч вара Мужество орден дене палемдалтын.
А.Сорокин нерген йолтшыж-влак поснак поро шарнымаш дене ойленыт, вет чолга рвезе жапше годым тале организатор, волонтёр лийын. 2015, 2016, 2017 ийлаште Андрей Юл кундем федерал округышто «iВолга» молодёжь форумым организоватлыме да эртарыме пашаште тыршен, Севастополь олаште Сеҥымашлан 70 ий теммылан пӧлеклалтше Военный-теҥыз парадыште всероссийский волонтёр корпусын посоложо лийын, «Утарыше-влакын всероссийский студент корпусышт» мер организацийын регион-шамыч коклаште эртыше X-шо чемпионатыштыже Марий Элын сборный командыжын составышкыже пурен, самырык-влаклан эртыше «Территория смыслов» (2016-шо ий), «Вектор спасения» (2015, 2016-шо ий), Доброволец-влакын всероссийский форумыштышт (2016, 2017-ше ий) лийын. Тудо – Францийыште эртыше SolidaritesJeunessesInternationalworkcamp волонтёр проектын участникше, футбол дене FIFA 2018 Тӱнямбал чемпионатыште Марий Эл гыч волонтёр, «ПГТУ-н студент лидерже-2018» конкурсын сеҥышыже да моло верат чолгалыкше дене ойыртемалтын.
Е.Эшкинина.
