Сабантуй – татар, башкир-влакын шошо пасу пашам мучашлымылан пӧлеклалтше тошто пайрем.
Тыгай шотан пайрем Юл кундемыште, Кавказыште илыше да марий-влакынат уло. Россий кӱкшытыштӧ Федерал Сабантуй 2001 ий годсек эртаралтеш да кажне ийын вержым вашталта.
Сабантуй – весела пайрем, тӱвыра да спорт программыжат пеш поян. Тиде пайремыште тамле кочкыш дене сийлат.
Сбербанкын Марий Элысе отделенийжын да банкын партнёржо-влакын (Марий кугыжаныш университет, «Медведевская ПМК» ООО да «Теплая речка» трактир) темлымышт почеш Сабантуйышто тӱнямбал кочкыш рекордым ышташ пеҥгыдемденыт – GigaChat искусственный интеллектын рецептше почеш эн кугу бармакым ямдылаш. (Бармак – изи рулет семын пӱтырыман, пӱкш кӧрган татар печене).
2024 ий – Еш идалык. Ешын символжылан курымла ончычак пушеҥгым шотлат. Садлан, икымше, рекордым шукташ 2024 бармакым ямдылат. Кочкышым ыштымаште «Теплая речка» трактирын озаже-влак Юлия ден Иван Антроповмыт тыршаш тӱҥалыт. Дарья ӱдырыштлан бармакым ямдылымым эскераш ӱшаненыт.
Кокымшо, печенем таптен ыштыме Еш Пушеҥгыш вераҥдат. Ойыртемалтше ты арверым лӱмынак пайремлан верысе мастар-влак ямдыленыт.
Еш Пушеҥгын укшлашкыже бармак-шамычым Федерал Сабантуйын почётан унаже-влак Марий Эл вуйлатыше Юрий Зайцев Российысе регионла вуйлатыше-влакын делегацийышт дене пижыктылыт. Проектым илышыш пурташ тыгак Сбербанкын Марий Элысе отделенийжым вуйлатыше Максим Бауков, МарГУ-н ректоржо Михаил Швецов, «Медведевская ПМК» ООО-н директоржо Аркадий Максимов надырым пыштат. Рекордым шындаш Шумо сеҥымаш да рекорд шотышто «Нацийын поянлыкше» тӱнямбал реестрын тӱҥ экспертше, Российысе ресторан критик Олег Назаровлан ӱшанат.
Рекордым пеҥгыдемдымеке, ямдылыме бармакым пайремын участникше-влаклан пуэдат, икмыняр ужашыжым йӱла почеш йоча пӧртлашке, интернатлашке да Марий Элын Паша да социальный аралтыш министерствыжын моло объектлашкыже колтат. А кӱртньым таптен ыштыме пушеҥге республикнан рӱдолажым сӧрастараш тӱҥалеш.
А.БАЙКОВА ямдылен
М.Скобелевын фотожо
