27-31 августышто Йошкар-Олаште «И Краткая» кинофестиваль тений кумшо гана лиеш.
Кызыт тушко ушнаш шонышо-влак деч йодмашым налыт. Тидым 20 май гыч 20 июль марте кинофестивальын www.yofest.ru официал сайтыштыже онлайн-йӧн дене ышташ лиеш.
Фестивальыште ончыктышашлык фильм-влак икмыняр направлений дене лийын кертыт:
- Кӱчык метражан модмо кино (40 минут марте);
- Кӱчык метражан документальный кино (40 минут марте);
- Кӱчык метражан анимационный кино (40 минут марте);
- Пеш кӱчык кино (5 минут марте), тудо модмо, документальный але анимационный лийын кертеш.
Сеҥыше-влакым кажне направлений денак посна номинацийлаште палемдат. Ешартыш номинаций (А.Я. Эшпай лӱмеш приз) фильмын эн сай музыкальный оформленийжылан пӧлеклалтеш.
Кинофестивальын программышкыже ойырен налме чыла фильмлан прокат удостоверений лийшаш. Кино тымарте ончыкталтын гынат, фестивльыште участвоватлен кертеш.
Организаторжо-влак – Марий Эл правительстве, Регионысо кинематоргафлан полшышо фонд, «Филдок» ден «Шаблий» компаний-влак.
Мероприятий кышкарыште кинофильм-влакым Йошкар-Олан рӱдӧ сценыласе экраныште ончыкташ тӱҥалыт.
Конкурслык программе деч посна мастер-класс, творческий вашлиймаш, Российысе лӱмлӧ кинематографист-шамыч дене «йодыш-вашмут» сессий-влак эртат.
Мероприятийын генеральный продюссерже Денис Шаблийын палемдымыж почеш, «И Краткая» фестиваль Йошкар-Олан визитный картычкышкыже савырнен шуктен.
Светлана Носова
