Йӱлана тек илана
Сӱрем Кугу Юмо деч – тазалыкым, тынысым
22 июльышто Волжский район Усола Корамасыште онапу воктене Сӱрем Кугу Юмылан кумалтыш эртен.
Корамас кундемыште Сӱрем пайрем шочмын тӱҥалеш да кугарнян Усолаште мучашлалтеш. Сӱрем Кугу Юмо деч ош марий калык поро серлагышым, серлагыш вач поро еш перкем, ешлан кучаш сурт перкем, суртым кучаш шочшо перкем, вольык перкем, шийвундо перкем, мӱкш перкем, поро деч поро тазалыкым пуэн шогаш пелештен кумалеш.
Сӱрем кумалтышыш тений тӱкан ден шулдыран дене толшо-влак шукырак лийыныт.
Волжский районын тӱҥ онаеҥже Аркадий Фёдоров Сӱрем Кугу Юмылан тауштен, тӱкан вольык, шулдыран дене, тичмаш кинде, саска сорта, шийвундо дене уло марий калыклан кече гай волгалтын илаш поро шулыкым да серлагышым йодын пелештен.
Тений ятырышт Украинысе спецоперацийыште улшо эргыштлан, палымыштлан тазалыкым, чылалан тыныс илышым йодаш толыныт.
Е.Эшкинина.
