Киров область Малмыж район Кальна (Калинино) селаште регион-влак кокласе «Келшымаш памаш» марий тӱвыра фестиваль кумшо гана эртен.
Тудо тений Российысе калык-влакын икоян улмо идалыклан пӧлеклалтын. Тушко Виче кундемысе Вӱрзым, Кильмезь районла, Татарстан Республикысе Балтаси район Улисъял, Марий Элысе Марий Турек район гыч усталык коллектив ден посна мурызо-влак ушненыт.
Малмыж районысо рӱдӧ каныме рӱдерын гыч «Ош пеледыш», Сатнур ялысе клубын «Ӱжара», Кугу Кетек тӱвыра пӧртын «Шонанпыл» йоча ансамбльышт-влак мероприятийым сӧрастараш полшеныт.
Фестивальыште кидмастар-влакын ыштыш-кучыш ончерышт, книга ден сувенир ярмиҥга лийыныт. Марий тӱвыра рӱдерын пашаеҥже Сергей Карповым тушко пагален ӱжыныт, молан манаш гын, тудын тыршымыж дене ынде икмыняр ий почела Йошкар-Олаште Виче велысе марий усталык коллектив-влакын фестивальышт эртаралтеш.
«Келшымаш памаш» фестивальым эртараш тӱҥалаш Малмыж районысо Пӧртек тӱвыра пӧртын пашаеҥже-влак эн ончыч темленыт. Тӱвыра пӧртшӧ Кальна рӱдӧ клуб системын филиалжылан шотлалтеш. Тушто марий ӱдырамаш-влак: вуйлатышыжлан Антонида Дегтерева да художественный руководительлан Роза Елпаева ыштат. Роза Аркадьевна шкеже Марий Элысе Кужэҥер Эҥербал ялыште шочын-кушкын. Шке жапыштыже Йошкар- Оласе тӱвыра колледжым тунем пытарен. Пӱрымаш тыге савыралын, Пӧртек велысе марий пӧръеҥ Александр Елпаевлан марлан лектын. Нуно Марий Элыштак палыме лийыныт: ончыкылык пелашыже Медведево район Куяр школышто физкультурым туныктен. Вара шочмо ялышкыже илаш кусненыт. Роза ынде 37 ий наре Пӧртек тӱвыра пӧртыштӧ тырша. Калык театрым, мурышо да куштышо йоча да кугыеҥ-влакын ансамбльыштым вуйлата, гармонист-влакымат чумыра. Мут толмашеш, пелашыжат – тале гармонист, кызыт Калинино тӱвыра пӧртыштак акомпаниаторлан ышта. Еш ансамбльыштат лийын, но ӱдырышт-влак ӧрдыж кундемыш илаш кусненыт, сандене пырля шуэн выступатлат.
А теве 11 ияш София уныкашт «Келшымаш памаш» фестивальыште Светлана Яндукован семжылан да Татьяна Япаеван мутшылан возымо «Юкече» мурым йоҥгалтарен. Сергей Карпов тудлан эн изи ийготан участнице семын Марий тӱвыра рӱдер деч шарнымашан пӧлекым кучыктен.
А молан ты фестивальым Кальна селаште эртареныт манын йодыш лектеш, очыни. Пӧртекыште калык койын шагалемеш. Улшо пӧръеҥ-шамыч кокла гыч иктышт СВО-ш каеныт, весышт Йӱдвелыш пашаш коштыт. Ты фестивальыште Пӧртекысе гармончо-влак шке усталыкыштым ончыктеныт гынат, нуным пырля чумыраш куштылго огыл, палемдыш Роза Аркадьевна. А шоктышыжо кудытын улыт.
Пӧртекыште марий шӱлышым тӱвыра пашаеҥ-шамычак арален да вияҥден кодаш тыршат. Сценылык вургемым ӱдырамаш але икшыве-влаклан кугурак ийготан-влак деч налын уэмдат, шкештат ыштат. Теве ковид карантин годым «Марий касым» эртараш тӱҥалыныт да кызытат шуят. Тушко пошкудо ялла гычат толыт. Каслан эсогыл кол шӱрымат шолтат. Ял калык тыгай мероприятийыш кумылын погына.
Фестиваль деке пӧртылына. Роза Аркадьевналан тудым шкаланжак вӱдаш логалеш. Ойлымыж почеш, фестивальыш кажне ийын утларак еҥ, коллектив ушна. Тений гын у участник-влак шукын лийыныт. Марий Эл гыч мийыше-влак поснак куандареныт. Мутлан, Марий Турек райрӱдысӧ тӱвыра пӧртын, Ешмет усталык коллектив-влак, Сенде гыч мурызо Анжелла Фирсовам калык шокшын вашлийын. Шернур район Кукнур кундем гыч самырык рвезе Кирилл Новосёлов гармоньчо да мурызо семын кумылым савырен. Виче кундемысе коллектив-шамыч шкештат ойыртемалтыт, поснак марий куштымашышт шкешотан улыт.
Светлана Носова
Снимкылаште: Пӧртек тӱвыра пӧртын пашаеҥже-влак (Роза Елпаева –шолаште, Антонида Дегтерева – пурлаште, София Дегтерева – покшелне) да гармонист-влак ансамбль Киров областьыште Марий Элын полномочный представительже, Мер Каҥашын еҥже Александр Макаров дене пырля.
Кальна рӱдӧ клуб системын воткыл лаштыкше гыч налме фото.
