Республикысе «Радиоэлектроника-РМТ» кластерыште тенийысе тунемме идалык гыч 9-ше классыште тунемше 16 ӱдыр-рвезе профессионал образованийым налеш.
«Молодёжь да йоча-влак» национальный проектын «Профессионалит» федеральный проектше почеш Марий радиомеханический техникумышто почылтшо тунемме-производство рӱдер – Марий Эл Образований да науко министерстве, тунемме вер-влак да индустриальный партнёр «ТЕХНОТЕХ» ООО кокласе вашкылым ончыктышо сай пример. Тений гыч кластерыште школышто тунемше йоча-влак «Слесарь механосборочных работ» профессийлан тунемыт. Нунылан занятийым техникумын преподавательже –влак кызытсе жаплан келшыше оборудованиян мастерскойлаште эртарат.
Рӱдерын индустриальный партнёржо тунемме программым ямдыла, базыштыже ончыкылык специалист-влаклан практикым эрташ йӧным ышта.
«Радиэлектронике профилян классын икымше выпускшо 2027 ийыште шошым лиеш. А тачысе тунемше-влак ончыкылык инженер, элекронщик улыт. Нуно мемнан республикын кӱкшӧ технологиян отрасльжым вияҥдаш тӱҥалыт. Пеҥгыдын ӱшанем, тиде классыште тунеммаш ӱдыр-рвезе-влаклан профессионал семын кушкашышт йӧным ышта», – каласен Марий Элын образований да науко министрже Лариса Ревуцкая.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
