Кызыт Запорожский область Куйбышев районысо рӱдӧ больницыште Марий Эл гыч мийыше врач-хирург ден врач-офтальмолог пашам ыштат.
– Верысе калык шинча дене кылдалтше тӱрлӧ ситыдымашлан вуйым шийын толеш, – у паша верже гыч палдара офтальмолог Наталья Беспалова (снимкыште). – Шукыштын вӱргорнышт локтылалтын, глаукомо, катаракте, тромбоз вияҥыныт, ятыр еҥлам шинчалык кӱлеш. Кугыеҥ-влакым приниматлем, но южгунам йоча-шамычланат полшыде ом керт.
– Больницыште врач-офтальмолог 2022 ий гыч лийын огыл, сандене пациент-влак моткоч шукын улыт, – манеш Куйбышев районысо рӱдо больницын тӱҥ врачше Евгений Зема. – Наталья Николаевналан кажне кечын 30 утла пациентым приниматлашыже логалеш. Тыгаяк кугу нагрузко дене хирург Андрей Оленин пашам ышта. Ме марий коллегына-влаклан нимучашдымын тауштена. Нуно мыланна пашаште кугу профессионал, кажне пациентлан уло шӱм-чон дене полшаш тыршыше поро доктор улмыштым ончыктат.
Мемнан врачна-влак 8 гыч 16 шагат марте пашам ыштышаш улыт, но шукыж годым больницыште пытартыш пациентым приниматлымеш кодыт.
Маргарита Иванова.
Марий Эл Тазалык аралтыш министерствын фотожо.
