Йошкар-Олаште чоҥалтше 2-шо №-ан йоча поликлинике 13 процентлан ямде.
Куд тӱжем утла квадрат метр кумдыкан медицине тӧнеж «Кужу да чолга илыш» национальный проектын «Здравоохраненийын первичный звеножым модернизироватлымаш» регионысо программыжын кышкарыштыже чоҥалтеш. Таче кечылан тудо 13 процентлан ямде.
Эртыше кечылаште Марий Элын тазалык аралтыш министрже Владимир Гладнев регионым вуйлатыше Юрий Зайцевлан поликлиникым чоҥымо паша нерген каласкален.
Тымарте цоколь пачашыште пырдыж ден туврашым, колонно ден кермыч кыдежлам армироватлен да бетонироватлен пытарыме, шокшо узеллан пучым ямдылен шуктымо, кызыт канализаций, олтымо, электроснабжений, батарей системылам шупшыт, икымше пачашыште пырдыж ден кыдежлам оптат, кокымшо пачашыште тувраш ден колонно-шамычым бетонироватлат.
У поликлиникым Интеграл микрорайонын кушкын толмыжым, тушко йочан шуко ешын илаш куснымыжым шотыш налын чоҥаш тӱҥалме. Чаманен палемдыман, кызыт 2-шо ден 4-ше №-ан поликлинике-влакын специалистышт кундемысе чыла йочан тазалыкшым эскерен огыт керт, тыгак медик-шамычын паша йӧнышт полышым пуымо кызытсе стандартым илышыш тичмашнек пурташ келшен огыт тол.
«Палем, тиде объектым оласе калык шукертак вуча, сандене чыла пашам шке жапыштыже ыштен шукташ кӱлеш», – каласен Юрий Зайцев.
Объектым 2025 ий шыжым почаш палемдыме. У поликлиникыште сменыште 500 йочам приниматлаш, могай транспорт коштмым шотыш налын, нагрузкым медицине тӧнеж-влак коклаште шеледаш, специалист-шамычын приёмышкышт логалме жапым кӱчыкемдаш, йоча-влаклан медицине полышым пуымо качествым саемдаш йӧн лиеш.
2025 ийыште «Здравоохраненийын первичный звеножым модернизироватлымаш» регионысо программым илышыш пурташ 519 миллион утла теҥгем ойырымо. Поликлиникым чоҥымо деч посна эше кок рентген аппаратым да ныл УЗИ аппаратым налме. Чыла оборудованийым республикнан медицине тӧнежлашкыже кондымо.
2025-2027 ийлаште Марий Эл здравоохраненийын первичный звеножым уэмдаш чылаже 545 миллион теҥгем ойырымо, тылечын 56,1 миллион теҥгежым – республикын бюджетше гыч.
Марий Элым вуйлатышын пресс-службыжын уверже негызеш Маргарита ИВАНОВА ямдылен
