4 июньышто Марий Эл Кугыжаныш Погынын председательже Анатолий Смирнов Кугыжаныш кучемын законым лукшо органже-влакын ассоциацийыштын Самарыште эртыше 72-шо заседанийыштыже участвоватлен.
Тушто Юл кундем федеральный округын регионлаштыже инноваций пашалан полшымо йодышым ик эн тӱҥ семын онченыт. Таче ПФО организаций-влакын инноваций дене кумдан пайдаланымышт шотышто ончылно кая. Тиде сферыште сай пример семын Татарстанысе «Иннополис» экономический кумдыкым палемдаш лиеш. Тыгайже Российыште икте гына. Тыште чыла гаяк еҥ IT-специалист, компаний-резидент-влакын чумыр элна гыч пашам ышташ толшо еҥже-влаклан йӧнан илыме вер льгото почеш ойыралтеш. Иннополисын кызытсе жаплан келшыше инфраструктуржо профессийыште кушкаш да вияҥаш йӧным ышта.
Кызыт Нижегородский областьысе вуз-влак коклаште тӱнямбал кӱкшытан IT-кампусым ыштат, Саровышто – Физикын да математикын калыкле рӱдерыштым, Ульяновск областьыште – регион кӱкшытан Интеллектуальный собственность рӱдерым, Мордовийыште «инновационный ваучер-влакым» шыҥдарат, Башкортостаныште партнёрлан шотлалтше регион-влак дене 10 кластерым чумырат.
Инновацийым медицине аланыш шыҥдарыме пашам тӱҥ направлений семын онченыт.
«Тыгак илыме кумдыкым тӱзатыме нерген пунчалым лукмашке вургыжшо чонан еҥ-влакым ушаш кӱлмӧ йодышым онченна, тидым верысе шкевиктемын калык дене пашам ыштыме тӱҥ корныж семын палемденна. Инноваций шотышто… Кызытсе жап чыла вереат у савыртышым йодеш, сандене инноваций пашалан кугыжаныш велым полшаш кӱлеш», – иктешлен палемден А.Смирнов.
Ассоциаций Кугыжаныш Думылан, Россий Федерацийын правительствыжлан, профильный министерстве ден ведомство-шамычлан, ПФО-што субъект-влакын кугыжаныш кучем органыштлан темлымаш-влакым ямдылен колтен.
М.ИВАНОВА
