Тыге манын Марий Элым вуйлатышын пашажым жаплан шуктышо Юрий Зайцев Медицине пашаеҥын кечыжлан пӧлеклалтше торжественный мероприятийыште.
Пайрем 24 июньышто Э.Сапаев лӱмеш опер да балет академический театрыште эртен. «Те пеш ответственный пашам шуктеда, тудын лектышыжлан айдемын тазалыкше, а шуэн огыл айдеме илышат шотлалтеш», – тазалык аралтыш аланын пашаеҥже ден ветеранже-влакым саламлымыж годым манын Ю.Зайцев да медик-шамычын у коронавирус инфекций ваштареш кучедалмашке пыштыме надырыштым посна палемден. Республикым вуйлатышын пашажым жаплан шуктышын мутшо почеш, медпашаеҥ-влак кызытат, Украиныште эртарыме военный спецоперацийыште, айдеме илышым утарымышт дене передовойышто военнослужащий-шамыч дене пырля ик радамыште улыт.
Медпашаеҥын профессийже ответственность, порылык, шкем чаманыдымаш дене кылдалтын, да республикысе врач ден медсестра-влак чылан тыгай улыт, палемден Ю.Зайцев да, пашам сайын шуктымылан, профессионализмым ончыктымылан, пациент-шамыч деке тӱткӧ улмылан тауштен, сулен налме награде-влакым кучыктен.
Здравоохраненийым вияҥдымашке надырым пыштымылан да пашам шуко ий тыршен ыштымылан Республиканский клинический больницын отделенийым вуйлатышыже Артем Зуев (снимкыште) Лука Крымскийын медальже дене палемдалтын. Тиде профильный кугыжаныш наградым Россий президент В.Путинын пунчалже дене учредитлыме.
«Россий Федерацийын сулло врачше» лӱмым Йошкар-Оласе эмлымверын регионысо вӱргорно рӱдерже отделенийжым вуйлатыше Елена Шишкиналан пуымо, «Марий Эл ончылно заслугылан» орденын медальжым Республиканский психиатрический больницын тӱҥ врачше Тагир Бедертдиновлан кучыктымо. Эше 11 медикым тӱрлӧ чап лӱм дене палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
