Марий Элыште йоча-влаклан кеҥежым канашышт да тазалыкым пеҥгыдемдашышт 80,5 миллион теҥгем ойырымо.
12 майыште Марий Элым вуйлатыше Юрий Зайцев РФ правительстве председательын алмаштышыже Татьяна Голикован 2023 ий кеҥежым йоча-влакын тазалыкыштым пеҥгыдемдыме кампанийым тӱҥалаш ямде улмо йодыш дене эртарыме видеосовещанийыште участвоватлен.
Вице-премьерын палемдымыж почеш, йоча-шамычын кеҥеж канышыштым организоватлаш элнан чыла гаяк субъектше ямде.
«Неле геополитический ситуацийым шотыш налде, кеҥеж кампанийлан ямдылалт шуктенна гаяк. Тидлан чыла коллегемлан тауштем», – манын Т.Голикова.
Марий Элыште реестрыш йоча-влаклан канаш да тазалыкым пеҥгыдемдаш келыштарыме 199 организацийым пуртымо. Тушто 22 тӱжем утла йоча, ты шотыштак неле илыш ситуацийыш логалше 12 тӱжем ӱдыр-рвезе, каналтен кертыт.
Рашракше, регионыштына ола деч ӧрдыжтӧ 18 стационар организаций, образовательный организацийлаште кечывалым каныме 175 лагерь, сутка мучко лийме кок профильный да палаткыште илыме ныл лагерь пашам ышташ тӱҥалыт.
Тылеч посна 160 веран ик санаторий лиеш. Тыгак 362 инвалид ден начар тазалыкан йочам кандараш палемдыме. Учётышто шогышо ик тӱжем утла подросткын канышыж ден пашам ыштен кертмыжланат кугу тӱткыш ойыралтеш.
Кок тӱжем наре тунемше республик деч ӧрдыжтӧ канаш палемден, ты шотыштак 300 наре еҥ – организоватлыме тӱшкаште.
Иктешлаш гын, тений кеҥежым 6,6-18 ияш 65 тӱжем (75 процент) йочам, подросткым, тунемше молодёжьым кандараш, эмлаш да пашаш пурташ палемдыме. Тидлан 80,5 миллион теҥгем ойыраш ыштыме.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
