Марий Элыште у коронавирус инфекцийын шарлымыж ваштареш кучедалме мере-влакым луштарыме.
Республикыштына эпидемиологический сӱретын саемын толмыжлан кӧра общественный питаний организаций-влакын паша радамышт шотышто чаракым кораҥдыме. Тылеч посна нуно сатулымо, сатулымо да веселаҥдыме рӱдер ден комплекслаште шке пашаштым умбакыже шуен кертыт, молан манаш гын палемдыме объектлашке ончычсо семынак QR-код дене пуртат.
«У коронавирус инфекцийын (COVID-19) шарлымыжлан кӧра Марий Эл Республик кумдыкышто калыклан санитарно-эпидемиологический велым сай илышым ыштыме шотышто мере-влак нерген» указыш пуртымо вашталтыш-шамыч дене келшышын, общепитын предприятийлаштышт калыклан Wi-Fi гоч Интернетыш яра лекташ йӧным ыштыме.
Ковид-чарак-влакым шинчымашым пуымо тӧнежлаштат луштарыме – 18 ияш марте ийготан граждан-влакым ешартыш шинчымашым пуымо программе дене очно туныкташ тӱҥалме.
«Чыла вашталтыш 25 февраль гыч вийыш пурен. Но ме чыланат умылышаш улына: лыпланаш эше эр, у коронавирус инфекций деч ончыкыжымат вакцинироватлалташ да тӱшка иммунитетым вияҥдаш кӱлеш», – манын Марий Элым вуйлатыше Александр Евстифеев совещанийыште.
Роспотребнадзорын Марий Элысе виктемжым вуйлатыше Светлана Булатован мутшо почеш, COVID-19 дене инфицироватлалтше чумыр еҥ гыч 80 процент ужашыже черым куштылгын чыта. Йоча-влакын черланыме чотышт 5,4 пачаш иземын, поснак 7-14 ияш ӱдыр-рвезе-влак коклаште сӱрет саемын.
Пытартыш 1,5 арняште амбулаторийыш медицине полышым йодын толшо-влак 2,5-4 пачаш шагалемыныт. Южо медорганизаций ковид деч ончычсо паша радамыш пӧртылын. Кугыеҥ ден йоча-шамычын диспансеризацийышт ден профосмотрыштым чыла гаяк поликлиникыште эртараш тӱҥалме, рашемден тазалык аралтыш министр Марина Панькова.
Эртыше арнян у коронавирус инфекций дене черланыше пациент-шамычлан медицине полышым пуымо койкым 30 процентлан шагалемдыме. 26 февральыште Сар-влакын ветераныштын республиканский клинический госпитальыштышт ковидный отделенийым петырыме, да медорганизаций тиде арнян ончычсо паша радамышкыже пӧртылаш ямдылалтеш. Йоча-влакым эмлаш келыштарыме 130 койко гыч 30 гына кодымо. Нелын черланыше да шодым искусственно вентилироватлыме йӧн дене шӱлышӧ пациент-шамычын чотышт иземын толеш.
Марий Эл Республикым вуйлатышын организаций да аналитике виткемжын уверже негызеш М.ИВАНОВА ямдылен
