3 июнь гыч Марий Элыште 166 тÿжем утла пенсионерын пенсийже 10 процентлан кугемеш, республикым вуйлатышын пашажым жаплан шуктышо Юрий Зайцевын эртарыме правительствын заседанийыштыже увертарен Россий Федераций Пенсий фондын Марий Элысе пöлкажым виктарыше Владимир Орехов.
Тыгеракын, регионыштына страховой пенсий кокла шот дене 17 тÿжем теҥге деч изиш шукырак лиеш, а эртыше тыгаяк жап деч – 1300 теҥгелан.
Ю.Зайцев президент Владимир Путинын шындыме задачыже-влакым тичмашнек шукташ, индексироватлыме сумман выплатым шке жапыштыже тÿлаш тÿҥалаш кÿлмым палемден.
Республикым вуйлатышын пашажым жаплан шуктышо Россий президентын «Йочан еш-влаклан тылзе еда тÿлыман окса выплате нерген» указшын шукталмыж нергенат умылкален.
В.Ореховын рашемдымыж почеш, 8-17 ияш йоча-влаклан выплатым палемдыме нерген йодмашым май тÿҥалтыш гыч налыт. Тылзе мучаш марте 30 тÿжем утла йодмашым ончымо, 25,5 йодмаш негызеш пунчалым лукмо. Таче кечылан выплатым тÿнен илыше еш гыч 11298 еҥлан палемдыме. Пурышо чумыр йодмаш гыч 61 процент ужашлан ешын доходшо палемдыме деч шукырак лекмылан кöра выплатым тÿлаш тореш лийме.
Ю.Зайцев йоча-влаклан выплатым тÿлымö да пашам ыштыдыме пенсионер-влакын пенсийыштым индексироватлыме йодышлам контрольышто кучаш кÿштен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
