Марий Эл вуйлатыше Юрий Зайцев Суд пристав-влак федеральный службын Марий Элысе управленийжын коллегийжын кумдаҥдыме заседанийжын пашашкыже ушнен. Тушто ведомствын 2023 ийысе пашажым иктешленыт да тений ыштышашым палемденыт.
Тиде мероприятийыште тыгак республикын Кугыжаныш Погынжын председательже Анатолий Смирнов, исполнительный кучем федеральный орган-влакын Марий Элысе территориальный органышт-влакын вуйлатышышт лийыныт.
Ӱмаште шуктымо паша нерген иктешлымашым управлений вуйлатыше Анатолий Иванов ыштен. Палдарымыж почеш, 2023 ийыште 12 тылзе жапыште республикысе суд пристав-влак 2 миллиардат 908 миллион теҥгем пӧртылтыктеныт. Тидыже ончылийысе дене таҥастарымаше 267 миллионлан шукырак.
Юрий Зайцев управленийыште ыштыше-влаклан пашам сайын шуктымыштлан тауштен.
– Тендан тыршыме дене бюджет веле огыл пойдаралтеш, тыгак еҥ-влакын да ийготыш шудымо икшыве-шамычын законный правашт шукталтеш. Специальный военный операцийыште улшо да элнан у кундемлаштыже илыше-влаклан 700 тӱжем утла теҥгеаш полышым пуымыдамат палемдыде кодаш нигузе огеш лий. Теният тыгак тыршен пашам ышташ тӱҥалыда манын ӱшанем, – каласен республик вуйлатыше.
Коллегийыште суд пристав службын ойыртемалтше пашаеҥже-влаклан ведомствын наградыжым кучыктеныт.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
