Килемар районышто у вӱд пучым июльышто шупшын шуктат.
Визымйӓр посёлкышто у вӱд пучым шупшмо паша мучашке лишемеш. Тудо 1 тӱжем утла еҥлан йӱшаш вӱдын качествыжым саемда. Вӱдым ямдылыме станцийым шындыме дене вӱдыштӧ утыждене улшо кӱртньӧ ден румбык нормыш толыт. Объектым «Яндар вӱд» федеральный проектым илышыш пуртымо кышкарыште чоҥаш йӧн лийын.
Марий Элым вуйлатыше Юрий Зайцев чоҥымо пашан шырымжым аклен да объектын кӱлешан улмыжым палемден.
«Районышто илыше-влак у вӱд пучым шукертсек вученыт. Сетьын утыжденат тоштеммыжлан кӧра аварий шуэн огыл лиеден, объектым чоҥымо дене тиде ситыдымаш чакна, вӱдын качествыже саемеш. Чыла пашам жапыштыже шукташ кӱлеш», – палемден регионым вуйлатыше.
Ю.Зайцев тыгак Килемар район администрацийын вуйлатышыж дене кундемым вияҥдыме задаче да радам, национальный проект ден регионысо программе-влакым илышыш пуртымо шырым, лектын шогышо нелылык нерген мутланен. Районышто неле йодыш-влакым шотыш кондаш, тыгак верысе корным олмыкташ республикын бюджетше гыч 10 миллион теҥгем ешарен ойыраш пунчалын. Тылеч посна Церкӹсола (Арде) ял шотан илемыште Тӱвыра пӧртым капитально олмыктат.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
