Йошкар-Оласе 11-ше №-ан лицей 100 ияш лӱмгечыжым палемден.
Образовательный тӧнежлан Социалистический Пашан Геройжо Таисия Ивановна Александрован лӱмжым пуэныт. Кумдан чапланыше педагог-математик тиде школышто кумло ий утла тыршен.
Лицейын ветеранже ден педагогшо, тунемшыж ден выпускникше-влакым законодательный органын лӱмжӧ дене Марий Эл Кугыжаныш Погын председательын икымше алмаштышыже Лариса Яковлева саламлен – образовательный тӧнежын директоржо Людмила Андреевалан марий парламентым вуйлатыше Михаил Васютинын саламлыме мутшым кучыктен.
Т.И.Александрова лӱмеш 11-ше №-ан лицей тунемше-влаклан сай шинчымашым пуымыж дене ойыртемалтеш. Тидым экзаменын результатше, йоча-шамычым посна туныктымо да воспитатлыме тӱрлӧ йӧн, науко да шымлыме паша лектыш пеҥгыдемдат.
Образовательный тӧнежыште регион-влак кокласе кӱкшытан «Александровский лудмаш» науко да практике конференций йӱлашке пурен. Лицейын педагогический коллективше – тиде шке пашалан ӱшанле, лицей ден йоча-влакым йӧратыше кӱкшӧ квалификациян специалист-шамыч.
«Тек лицей шке историйжым эше шуко-шуко ий у лаштыклашке воза, а выпускник-влак ончыкыжым шке педагогышт ден тунемме верыштым шокшын шарналтат», – образовательный тӧнежын кугу ешыжлан тыланен Лариса Яковлева да кушкын толшо тукымым туныктымашке да воспитатлымашке шке надырым пыштыше педагог-шамыч Нина Дударлан, Тамара Разумовалан, Люция Кавиевалан, Нина Малыгиналан Кугыжаныш Погынын Чапкагазшым кучыктен.
Маргарита ИВАНОВА.
Марий Эл Кугыжаныш Погынын фотожо.
