Юрий Зайцев: «Республик кӧргысӧ туризм верч тыршаш тӱҥалына»
Тидын нерген Марий Эл вуйлатышын пашажым жаплан шуктышо республикын Кугыжаныш национальный политике концепцийжым илышыш пуртымо шотышто правительственный комиссийын заседанийыштыже каласен.
– Мемнан республикыште моткочак поро кумылан да унам вашлийын моштышо еҥ-влак илат. Туристический куатнат кугу – тиде архитектур, пӱртӱс, тӱвыра. Но мондыман огыл: турист-влакым шке велке савырыме верч кызыт ме веле огыл, Российысе чыла гаяк регион-влак таҥасат. Эл кӧргысӧ да ӧрдыжкӧ лектын коштмо туризмлан йодмаш чот кушкын, сандене еҥ-шамыч лачшымак мемнан деке толышт манын, эше сайынрак тыршыман, – ойлен Юрий Зайцев.
Заседанийын участникше-влакын палемдымышт почеш, Юл кундем федерал округышто 1 еҥлан мыняр турист логалме шотышто Марий Эл – икымше верыште. Ӱмаште регионыш 480,6 тӱжем турист ден экскурсант толын каен.
Республикыште чылаже 279 турист маршрут ден экскурсий программе уло, тышеч 73 – этнотуристический. Тыгак кок бренд турист маршрут пашам ышта. Тиде – «Чудеса земли Марийской» да «Край звонких гуслей». Нуно регион-влак кокласе «Великий Волжский путь» проектыш пурталтыныт.
Эл кӧргыштӧ да ӧрдыжкӧ лектын коштмо туризмым вияҥдаш кумылаҥдышашлан Марий Эл вуйлатышын грантше пуалтеш. Тений тудын кугытшо – 900 тӱжем теҥге. Грант полышлан кӧра чылаже 17 проект илышыш шыҥдаралтын.
Заседанийыште миграций дене кылдалтше йодышымат каҥашеныт. Юрий Зайцевын ойлымыж почеш, тудын кугытшо ковид деч ончычсо жапышке шуэш: республикыш йот элла гыч еҥ-влак тунемаш, пашам ышташ да канаш толыт.
– Нуно Индий, Кокла Азийысе элла гыч улыт. А кызыт Украине, ДНР, ЛНР гыч толшо-влак шукемыт. Марий Элыште чылаштым куанен вашлийыт. Еҥ-влаклан полшыман, поро кумылым ончыктыман. Тыгодым легальный огыл миграций дене кучедалман, – ойлен Юрий Зайцев.
Марий Эл Республикым вуйлатышын организаций да аналитике виктемжын уверже-влак негызеш Л.Камалетдинова ямдылен.
