Марий Элым вуйлатыше Юрий Зайцев «Перспектива» социальный адаптаций рӱдерыш миен коштын.
Неле илыш йыжыҥыш логалше-влаклан шуко шотышто полшышо тиде рӱдер Йошкар-Олаште Советский уремысе 176-шо №-ан пӧртыштӧ верланен. Шукерте огыл тудым капитально олмыктымо да кӱлешан тӱрлӧ арвер дене пойдарыме. Тидлан 11 миллион утла теҥгем кучылтмо. Таче «Перспективыште» еҥ-влаклан тичмаш илышыш пӧртылаш чыла йӧн уло.
Юрий Зайцев уэмдыме рӱдерыште психологын да адаптивный физкультур кабинет-влакым, ургымо да паша мастерской-шамычым ончен, тыгак пашаеҥ ден социальный услуго дене пайдаланыше еҥ-влак дене мутланен. Регионым вуйлатыше неле илыш йыжыҥыш логалше-шамычлан полшымо чыла йӧным кӱлешан семын палемден.
«Марий Эл калыкым социально аралыме йодышлан кугу тӱткышым ойыра. Уэмдыме рӱдер – неле илыш йыжыҥыш логалше еҥ-влаклан нормальный илышыш пӧртылаш полшышо кӱлешан объект», – манын тудо.
Рӱдерын штатыштыже социальный паша шотышто специалист, психолог, социальный педагог, паша да адаптивный физкультур шотышто инструктор, фельдшер улыт. Куснылшо бригаде идалыкын йӱштӧ пагытыштыже кажне кечын 30 наре суртдымо еҥым шокшо кочкыш дене пукша. Рӱдер ий еда регионышто илыше 200 наре еҥлан полша.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
