Марий Эл вуйлатыше Юрий Зайцев республикысе правительствын у структурыжым пеҥгыдемден.
Тудын дене келшышын, исполнительный кучем органыште кок алмаштышлан шагалрак лиеш.
Тыгак ышталтыт:
Марий Эл Республикын Янлык тӱня объектым аралыме, эскерыме да кучылтмым виктарыме шотышто департамент;
Марий Эл Республикын молодежный политике комитетше;
Закупко сферыште контракт системым виктарыме шотышто Марий Эл Республикын комитетше.
Социальный вияҥмаш министерствыш Калыклан паша верым ситарыме департамент ушалтеш. Ведомство Марий Эл Республикын Паша да социальный аралымаш министерствыже маналташ тӱҥалеш.
Информатизаций да кыл департамент Марий Эл Республикын цифровой вияҥмаш министерствышкыже савырна.
Молодежный политике, спорт да туризм министерстве Марий Эл Республикын спорт да туризм министерствыже маналташ тӱҥалеш.
Марий Эл республикын Гражданский обороно да калыкым аралыме комитетшылан территориальный обороно шотышто мероприятийым организоватлыме да эртарыме ужашыште полномочий пуалтеш.
Андрей Костенко Марий Эл правительстве председательын алмаштышыже, Марий Элын РФ президент пеленсе постоянный представительже обязанностьым шуктымо деч кораҥдалтын.
Марий Эл вуйлатышын организационно-аналитический управленийжын вуйлатышыже Светлана Балбышева шкежын йодмыж почеш паша гыч кораҥдалтын.
Кызытеш тыгай вашталтыш-влак лийыныт.
Л.Камалетдинова
