«Россий» выставке-форумышто Марий Элын кечылажым республикым вуйлатыше Юрий Зайцев почын. Республикын стендшым кугу уна-влак: Россий Правительстве Председательын алмаштышыже Дмитрий Чернышенко ден Россий Федераций Президентын Юл кундем федеральный округысо полномочный представительже Игорь Комаров ончен савырненыт.
Юрий Зайцев «Россий» тӱнямбал выставке-форум Владимир Путинын кӱштымыж почеш эртаралтеш манын палемден да Российын президентшылан, тыгак республикылан пеш кӱлешан тиде мероприятийыште лийше чыла еҥлан таум каласен. Выставкыште участвоватлымаш, ешарен Марий Элым вуйлатыше, регионын вий-куатшым ончыкташ, шуктен толмо проект-влак нерген каласкалаш кугу йӧным пуа.
Республикын кечылажым почшыжла, Марий Элым вуйлатыше регионын шкешотан сылне культурыжым, туристический ден инвестиционный пеш кугу вий-куатан улмыжым палемден.
«Марий Эл Республик – ӧрыктарыше кундем, ончалын савырнет гын, тудым эрелан йӧратен шындет. Тудо экологий велым аклымаште Российын ик эн яндар регионжылан шотлалтеш, кундем айдемылан илашыже ик эн келшыше. Республик ойыртемалтше архитектурыж да сылне пӱртӱсшӧ дене чаплана»,– каласен уна-влаклан Юрий Зайцев.
Кызыт республикысе шуко ял ойыртемалтше сын-кунжым арален коден, еҥ-влак акрет годсо йӱлаштым шуктен шогат, ешарен Марий Элым вуйлатыше.
Вараже Юрий Зайцев регионын тӱрлӧ сферыште шумо сеҥымашыж нерген радамлын каласкален. Тыге, республикым вуйлатышын мутшо почеш, негызыш савырныше отрасльлан промышленность ден ялозанлык шотлалтыт. Марий Эл торгово-йӱкшемдыше оборудованийым, кӱртньӧ омсам, электроустановочный изделийым ыштен лукмо шотышто Российыште лидерлан шотлалтеш.
Юрий Зайцев тыге палемден: республикысе экономикын тӱҥ отрасльже-влакын продукцийышт 86 элыш да Российын 70 регионышкыжо колталтеш. Экспортышто тӱҥ верым машиностроенийын продукцийже, целлюлоз-кагаз изделий, сурткайык шыл, шыл кочкыш, шӧр, консерве, комбикорма налын шогат.
«Республик кочкышым шкалан ситара веле огыл, шуко моло регионыш, вес эллашке колтен шога. Ме ик еҥлан шотлымаште сурткайык шылым, пареҥгым, пакчасаскам ыштен налме шотышто ПФО-што икымше верыште улына. Вольык озанлык, пасу паша да перерабатыватлыше промышленность объект-влакым чоҥымо да пужен уэмдыме шотышто кугу инвестиционный проект-влакым шуктен толмаш республикым умбакыже вияҥаш кумда корным почеш»,– каласен Юрий Зайцев.
Марий Элым вуйлатыше тыге палемден: социальный ден экономике велым вияҥме чыла сферыште сай лектышыш шумо, моло регион дене пырля пашам ышташ да кылым кучаш эреак ямде улына.
«Марий Элыш пагален ӱжына!»,– каласен Юрий Зайцев уна-влаклан.
Регион дене палдарыме деч вара Марий Элым вуйлатыше «Пӱртӱсым аралыме Всероссийский обществе» мер организацийын председательже Вячеслав Фетисов дене пырля ойпидышым пеҥгыдемденыт. Тиде документ йырым-йырысе средам аралыме да экологический лӱдыкшыдымылыклан йӧным ыштыме, социалный кӱлешлыкан задаче-влакым тӧрлымӧ, граждан-влак коклаште экологический просвещенийым вияҥден колтымо, йӧнан средаште илаш еҥ-влакын праваштым шуктымо йодышла дене Россий Федерацийын да Марий Эл Республикын законодательствыштым саемдымашке виктаралтын.
Республикын кечылаже эртыме жапыште пеш кумда программе темлалтын. Уна-влак национальный кухньо дене палыме лийыныт, кулинарный ден творческий мастер-класслаште участвоватленыт, «Марий сӱан» театрализованный представлениым онченыт, IT сферыште, туризмыште да моло пашаште шумо сенымаш дене палыме лийыныт. ВДНХ-н тӱҥ сценыштыже «Марий Калыкын куштымашыже» концерт ончыкталтын.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
