Утарыше-влак У ий деч ончыч, 27 декабрьыште, шке профессионал пайремыштым палемдат.
1990 ийыште лач ты кечын РСФСР Министр-влак советын пунчалже дене Утарыше-влакын российысе корпусыштым ыштыме.
Таче Эрик Сапаев лӱмеш опер да балет академический театрыште Утарыше-влакын кечыштлан пӧлеклалтше торжественный мероприятий эртен. Республикысе утарыше службын ветеранже ден пашаеҥже-шамычым Марий Эл Кугыжаныш Погынын председательже Михаил Васютин саламлен.
– Тендан пашада – мландымбалне ик эн суапле. Те туткарыш логалше-шамыч деке икымше толыда, пӱртӱс азап ваштареш шогеда, чрезвычайный ситуацийым чактарыме да тудын деч кодшым кораҥдыме шотышто неле задаче-влакым шуктеда. Пашадан кӱлешлыкшым чын аклен мошташ неле, – марий утарыше-влаклан шкем чаманыде шуктымо пашаштлан, весын ойгыжым умылымыштлан, лӱддымӧ да патыр улмыштлан тауштен палемден марий парламентын вуйлатышыже.
Михаил Васютин, пеҥгыде тазалыкым, сай илышым, нимучашдыме куатым, шочмо эллан служитлыме пашаште сеҥымашым тыланен, Россий МЧС-ын Марий Элысе Тӱҥ виктемжын эн сай пашаеҥже-шамычлан законым лукшо органын Таумутшо-влакым кучыктен.
Марий Эл Кугыжаныш Погынын пресс-службыжын уверже негызеш Маргарита ИВАНОВА ямдылен
