Йошкар-Олаште Марий Элын Ий полатше пеленысе площадкыште Теплоэнергетике дене мультимедийный рӱдер почылтын.
«Т Плюс» ПАО-н тунемме-каныме рӱдерже интерактивный тоштер гай, тушто йоча-влак шокшым пуышо кызытсе электростанцийын пашаже дене палыме лийын кертыт.
Регионым вуйлатыше Юрий Зайцевын кӱштымашыже почеш, рӱдерым почмаште республик правительстве председательын алмаштышыже Александр Сальников лийын. «Тышке толшо икшыве-шамычлан теплоэнергетике тӱняш оҥай путешествий темлалтеш. Интерактивный тоштерын пашажым сайын организоватлыме, сандене экскурсий йочан ушешыже кодеш», – каласен тудо.
Александр Сальников ешарен: ончыкыжым иктажше ты сфер дене профессийым шканже ойыра манын ӱшан уло.
«Школышто тунеммем годым арам огыл мемнам экскурсий дене производствыш коштыктеныт, практикат тыгай верыштак лийын. Сатун кузе ышталтмыжым йоча шке шинчаж денак ужеш гын, тудо ончыкыжым кӧ лийме шотышто сайынрак палаш тӱҥалеш. Мемнан элын инженер кадрже квалификациян специалист-влак дене пойдаралтше манын шонем. А вет чылажат йоча жап гыч тӱҥалеш. Тек икшывын ойыраш праваже лиеш», – палемден тудо.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
