Марий Элым вуйлатыше Юрий Зайцев «Кумыл кож» поро кумыл акцийыш ушнен.
22 декабрьыште тудо Кремльыште кож гыч у ий шарым налын да Марий Эл гыч Алина Смирнован планшетан лияш шонымыжым рашемден.
Алиналан – 10 ий, тудын ачаже специальный военный операцийыште участвоватла, элым аралаш доброволец семын каен.
Кумыл кожышто Алинан акажынат шарже кечен. Кудымшо классыште тунемше Лейсан пӧлек шотеш ноутбукым вучымыж нерген возен.
Ю.Зайцев ака-шӱжарым когыньыштымат куандараш шонен пыштен.
– Тыгай акций улмылан пеш куанем. Йоча-влак У ийым шке семынышт вучат, да ме, кугыеҥ-влак, тыгай сай пайрем вашеш нуным куандарышаш улына. Алина ден Лейсанын шонымашыштлан шукталташ кумылын полшем, – манын тудо.
26 декабрьыште Ю.Зайцев у ий кож гыч Йошкар-Олаште илыше акак-шӱжарак Маловамытын шарыштым налын: кандаш ияш Ксюша пайремлан пӧлек шотеш коньким йодын, а 13 ияш Диана – ноутбукым.
«Ксениян шонымашыжым уло кумылын шуктем, ӱдыр теле гоч веле огыл, кеҥежымат Ий полатыште мунчалташ тӱҥалеш манын ӱшанем. А Дианалан ноутбук тунеммаштыже кӱлеш лиеш», – палемден регионым вуйлатыше.
Ю.Зайцев Медведево районысо Лӱльпан ял гыч Вероника Саванынат шаржым налын. Тиде ӱдырат У ий деч ончыч планшетан лияш шонымыжым возен.
Республикым вуйлатышын у ий кож гыч налме пытартыш шар Советский посёлко гыч Анна Конюкован лийын. Ю.Зайцев 11 ияш ӱдырлан ушан шагатым пӧлеклаш сӧрен.
27 декабрьыште республикым вуйлатыше сӧрымыжым шуктен, тудо кажне йочалан шонымо да вучымо пӧлекшым торжественно кучыктен. Тиде кечын пенсионер Юрий Тупицынынат шонымашыже шукталтын – Ю.Зайцев деч у гармоньым налын. «Пеш кугу тау. Пеш вучыдымын. Поро шонымаш чынжымак шукталтеш», – манын тудо.
«У ийыште чыла шонымашда шукталтше. Тӱҥжӧ таза, мотор, ушан да пиалан кушса, а ме эре пеленда лийына да тыланда пашам ышташ тӱҥалына», – тыланен регионым вуйлатыше.
«Кумыл кож» поро кумыл акций «Мый денем пырля шонкале» всероссийский поро кумыл проектым да «Кажне пӧртыш У ийым» общероссийский акцийым эртарыме кышкарыште илышыш пурталтеш. Тудо 28 февраль йотке шуйна.
2022 ийыште Марий Эл гыч 68 участник акцийын сайтыштыже кумылым шуктымо нерген йодмашым коден.
Марий Эл Республикым вуйлатышын администрацийжын увер паша пӧлкажын уверже негызеш М.ИВАНОВА ямдылен
