Марий Элым вуйлатыше Юрий Зайцев Йоча республиканский клинический больницыште эмлалтше пациент-влакым Йочам аралыме тӱнямбал кече дене саламлен.
Стационарыште эмлалтше ӱдыр-рвезе-влаклан пайрем программым ямдыленыт. Ю.Зайцев йоча-влаклан писынрак паремаш тыланен да пӧлек-шамычым кучыктен.
«Таче моткоч чапле пайрем. Илышыште черланашат логалеш, но чыла тиде жаплан гына. Таза, пиалан кушса, ача-авадам йӧратыза да аклыза, молан манаш гын те нунылан эн шергакан улыда. Нуно тендам аралат, тендан верч тургыжланат. Саламлем тендам Йочам аралыме тӱнямбал кече дене. Тыланем пиалым, куаным, ӱшанле йолташ-влакым, волгыдо да кечан кеҥежым», – манын республикым вуйлатыше.
Ю.Зайцев кечывалым да сутка мучко пашам ыштыше стационарын реабилитаций отделенийжым, у инфекционный корпусын чоҥымо площадкыжым ончен савырнен.
«Тазалыкым пеҥгыдемдаш келшыше медицине реабилитаций» федеральный проектым илышыш пуртымо кышкарыште ӱмаште йоча нейрореабилитационный отделенийлан 50,5 миллион теҥгеаш 127 медицине изделийым налме.
Тений апрельыште у инфекционный корпусым нӧлташ тӱҥалме. Кызыт стационар 1963 ийыштак чоҥымо зданийыште пашам ышта, тудын келшен толдымыж шотышто калык деч шагал огыл вуйшиймаш пура. Марий Элым вуйлатыше объектым чоҥымо йодышым федеральный кӱкшытыштӧ ик гана веле огыл нӧлтатын.
2023 ий 30 декабрьыште Россий Минздрав дене Йоча республиканский клинический больницын инфекционный корпусшым чоҥаш федеральный бюджет гыч субсидийым – 783 миллион наре теҥгем – ойырымо нерген келшыкым ыштыме.
Проект дене келшышын, зданий вич пачашан лиеш, тушто 76 койкым шындат. Объектым 2026 ий 30 сентябрь марте чоҥен пытараш палемдат.
Марий Эл вуйлатышын пресс-службыжын уверже негызеш М.ИВАНОВА ямдылен
Д.Речкинын фотожо/ «Марий Эл» увер агентстве