Марий Элын кучемже Йошкар-Оласе кудывечылам олмыкташ 75 миллион теҥгем ойырен.
Марий Эл вуйлатышын пашажым жаплан шуктышо Юрий Зайцев, должностьыш шогалмекыже, рӱдоласе кудывечылам тӱзатыме йодышлан вигак тӱткышым ойырен. Мэрын мутшо почеш, кызыт пашам тӱҥалме. Граждан-влак деч кушеч шукырак йодмаш пурен, эн ончыч ту кумдыкым олмыктат, тыгак социальный тӧнежла-влакын вераҥмыштым шотыш налыт. «75 миллион теҥгем ойырымо – иканаште тынар оксам нигунам кучылтмо огыл. 10 кудывечым олмыктена», – ойлен Евгений Маслов. Таҥастараш вес цифрымат каласен: пытартыш 5 ий жапыште кудывечылам ачалаш 145 миллион теҥге каен, кокла кугыт дене шотлаш гын, идалыкыште 29 миллион наре теҥгем кучылтмо. Но тыгодым тӱҥ пашаже «Оласе йырвелым йӧнаным ыштымаш» нацпроект почеш шукталтын.
Юрий Зайцев олмыктымаш кузерак каен шогымо, могай кудывечым молан эн ончыч ойырен налме нерген калыклан умылтараш йодын. «Еҥ-влак уверым палышаш улыт», – каласен тудо Йошкар-Оласе кудывечылам да калык тӱшкан илыман кумдыкым тӱзатыме йодыш дене чумырымо оперативный совещанийыште.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
