УВЕР ЙОГЫН

QR-код – кӱлешан документ

 

Россий Федерацийыште 1 ноябрь гыч кӱлешан закон ден правил-влак вийыш пурат.

  • Рӱдӧ Банк писын тӱлымӧ системе дене пайдаланымылан эн кугу комиссийым палемден: тылзыште 100 тӱжем теҥге деч кугу суммым кусарыме годым клиент деч 0,5 процентым, но 1,5 тӱжем теҥге деч шуко огыл кучен кодаш пунчалын. 100 тӱжем теҥге марте суммым кусарымылан комиссийым огеш нал.
  • Сыра ден сыра шотан напитке, сидр, пуаре, мӱй пӱрӧ деч моло алкогольым этил спиртым ешарыде ямдылыше-влак 1 ноябрь гыч тӱҥ технологический оборудованийын производственный куатшын расчётшым Росалкогольрегулирований органыш колтышаш улыт.
  • Заёмщикын доходшо обязательствым шукташ огеш сите гын, Рӱдӧ Банк тудын кредит але займ условийжым вашталтыме нерген йодмашыж дене келшаш темлен. 2021 ий 1 ноябрь гыч 31 декабрь марте гражданин шкенжын але ешысе моло еҥын ковид дене черланымыштым пеҥгыдемдыше документ ден йодмашым банкыш намиен пуэн кертеш. Тидым парымым тымарте иземдыше-шамычат ыштен сеҥат. Рӱдӧ Банк тыгай заёмщик-влакым штраф да пени деч утараш темла.

Полшымо шотан тиде мере дене изи да кокла предпринимательствын субъектше-влакат пайдаланен кертыт.

  • Шергакан металлым кӱнчен лукшо да ямдылыше юридический лица-влак 1 ноябрь гыч мыняр шергакан металлым кӱнчен лукмо да переработатлыме нерген уверым ГИИС ДМДК специальный системыш шке кумылын пуртен кертыт.

Спецучётышто шогышо да шергакан металл ден кӱм производствышто, наукышто да социально-культурный пашаште кучылтшо юрлица ден амалкалче-шамычат нине металл ден кӱм налме да кучылтмо нерген уверым системыш шке кумылын пуртен кертыт.

Вашталтыш РФ Музей фондыш пуртымо музей арвер ден коллекцийым аралыше, шымлыше да экспонироватлыше организацийла дене кылдалтын огыл.

  • 8 ноябрь гыч РФ тазалыкым аралыме министерствын 2021 ий 22 октябрьыште «Об утверждении формы медицинской документации “Сертификат о профилактических прививках против новой коронавирусной инфекции (COVID-19) или медицинских противопоказаниях к вакцинации и (или) перенесенном заболевании, вызванном новой коронавирусной инфекцией (COVID-19)” и порядка ее ведения» кӱштымашыже вийыш пура.

Документыште прививкым ыштыктыше еҥын фамилийже, лӱмжӧ, ачалӱмжӧ, шочмо жапше, пӧръеҥ але ӱдырамаш улмыжо, илыме вержын адресше да документым ыштыме жап ончыкталтыт. QR-кодлан вер ойыралтеш. Тылеч посна айдемын прививкым могай вакцине дене, кунам да кушто ыштыктымыже ончыкталтеш. Тыгак ревакцинаций, медицине велым чарак улмо, черым чытен лекме нерген увер-влак пурталтыт. Тымарте ыштыме сертификат-влакым Кугыжаныш услуго порталыште у кӱштымашлан келшышын оформитлат.

  • Российын шуко регионыштыжо вакцинацийым эртыме але у коронавирус инфекцийым чытен лекме уверан QR-код системе пашам ышташ тӱҥалеш. Тудо спорт мероприятийыш, театрыш, музейыш, моторлык салоныш да моло верыш пураш кӱлеш.
  • Электрон кадр документ дене пайдаланыме эксперимент мучашке лишемеш. 15 ноябрь марте пашам пуышо-шамыч шке увер системышт але «Работа в России» системысе «Электрон кадр документооборот» подсистеме дене пайдаланат. 2022 ий 15 январь йотке Минтруд Россий Федераций правительствыш экспериментын иктешлымашыжым да законышко вашталтышым пуртымо нерген темлымашыжым колтышаш.
  • Компаний ден амалкалче-влак корпоративный телефон номерышт нерген уверым 2021 ий 30 ноябрь марте пуышаш улыт, уке гын нине сим-карте-шамычым 1 декабрьыште блокироватлат. Пашаеҥ-влак нине уверым тергышаш улыт. Кок сомылжымат Кугыжаныш услуго порталыште шукташ лиеш. Тиде закон телефон мошеньык-влак ваштареш кучедалмашке да аноним сим-карте полшымо дене осал пашам ыштыме чотым иземдымашке виктаралтын.

                                                                                                                                                М.ИВАНОВА ямдылен

Опубликовать в Одноклассники

Добавить комментарий