Марий Элыш Россий Федераций транспорт министр Андрей Никитин паша дене толын коштын.
Республикыште лиймыж годым тудо кугу тӱткышым регионын корно-транспорт инфраструктуржылан ойырен.
«Федеральный рӱдерлан, Россий Федерацийын Транспорт министерствыжлан кӧра Россий президент Владимир Владимирович Путинын мемнан ончылно шындыме задаче-влакым шукташ йӧн ышталтеш. Корным, искусственный сооруженийым чоҥаш да олмыкташ, тыгак общественный транспортым уэмдаш средства ойыралтеш», – каласен Юрий Зайцев.
Министр Йошкар-Оласе аэропортын у пассажир терминалжым, самолётлан волен шинчаш да чоҥештен кӱзаш кумдыкым (тудо 42 процентлан ямде) ончен. Аэродром инфраструктурым уэмдыме пашам 2027 ийлан мучашлаш палемдыме. «Россий Федерацийын субъектлаштыже транспорт инфраструктурым вияҥдыме паша – Транспорт министерствын тӱҥ задачыже. Ме умылена, республикыште илыше калык у авиасообщенийым почмым вучат. Тӱҥ задаче – палемдыме жаплан аэропорт пашалан ямде лийшаш», – палемден Андрей Никитин.
Регионым вуйлатыше ден министр эше ик кӱлешан объектым чоҥымо нерген мутым тарватеныт. Тиде Козьмодемьянск трактыште Йошкар-Ола гыч лекме корно савыртыш. Тушто чӱчкыдынак паша гыч толмо да кайыме жапыште автомашина-влак кужу черетыште шогат. Тидым шотыш налын, чоҥымо пашам палемдыме жапыште огыл, ончычрак – шушаш ийын – тӱҥалыт.
Вашлиймаште палемдыме: Марий Элыште корным чоҥымо паша виян ышталтеш. Тӱҥ корно сеть 88,9 процентлан норамтивлан келшыше лийын шуктен, тиде планысе показатель деч кугурак.
2026 ийыште республикыштына 264 километр кужытышто корным шотыш кондаш палемдыме. Тыгак общественный транпортым уэмдыме паша умбакыже шуйналтеш. «Единый Россий» партийын депутатше-влак эше икмыняр автобусым налаш кӱлмӧ йодмаш дене лектыныт. Россий Федераций Транспорт минстерстве тидлан субсидийым ойыраш палемден, тудын полшымо дене республиклан эше 12 единице автобусым налаш йӧн лиеш. 2021 ийыште регионыш чылаже 102 автобусым да 25 троллейбусым кондымо.
Марий Элын социальный да экономике могырым вияҥме посна программыж дене келшышын, Юл эҥерыште причал чоҥалтеш. Шукерте огыл Козьмодемьянскыште пассажир-влаклан причалым пашаш колтымо, тыгак кызыт Юрино посёлкышто у причал ышталтеш.
Марий Элым вуйлатышын пресс-службыжын уверже негызеш Галина Кожевникова ямдылен.
Марий Элым вуйлатышын пресс-службыж гыч налме фото.
