Идалык мучаш марте эше 157 тулык йоча илыме верым налеш.
Тидын нерген регионын чоҥымо паша, архитектур да илыме вер ден коммунальный озанлык министрже Михаил Степанов 4 июльышто эртыше оперативный совещанийыште Марий Элым вуйлатышын пашажым жаплан шуктышо Юрий Зайцевлан каласкален.
Доклад дене келшышын, 2022 ийыште тулык йоча-шамычлан пачерым ойыраш чылаже 373 миллион наре теҥгем колташ палемдыме. План почеш 297 пачерым пуаш кӱлеш.
140 тулык йоча илыме верым уже налын, ты шотыштак 120 пачерым – Семёновка селаште чоҥымо у пӧртыштӧ.
Семёновка селаште 2022 ий декабрь марте эше ик пӧртым чоҥен пытарат. Тушто 49 тулык йоча пачерым налеш. Июльышто Советский районысо Солнечный посёлкышто пӧртым чоҥен шуктат. Тушто тулык йоча-влаклан 2 пачер ойыралтеш. Эше ик пӧртым Волжскышто нӧлтат. Тушко аварийныйлан шотлымо пӧртлаште илыше-влак да 20 тулык йоча куснат. Декабрь марте Медведево районысо Шойбулак селаште пӧртым чоҥен пытарат. Тушто тулык йоча-шамычлан 34 пачерым пуат. Эше 2 пачерым Юрино районышто ойырат.
Тылеч посна 10 пачерым «Ялысе доктор» да «Ялысе туныктышо» программе-влак дене налаш палемдыме, увертарен регионысо Минстройым вуйлатыше.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
