УВЕР ЙОГЫН

Мондалтше тӱр угыч «пеледын»

Мондалтше тӱр угыч «пеледын»

Йошкар-Оласе калык-прикладной сымыктыш тоштерыште Фелония  Шестакован «Тошты овуцавлӓ семынь» («Сохраняя традиции») лӱмгече ончерже почылтын.

Кидмастар 1957 ий 19 февральыште Курыкмарий район Тьотянсола ялыште шочын-кушкын. Тӱрлаш тудым кова ден аваже изиж годымак туныктеныт. Фелония Николаевна Йошкар-Оласе «Труженица» фабрикын Козьмодемьянск оласе филиалыштыже да мӧҥгыштыжӧ тӱрлызылан ятыр ий ыштен. Тудын деч ончыч тошто тӱрым шымлыше, палыше да ыштыше тӱрызыжӧ Курыкмарий кундемыште лийыныжат огыл манаш лиеш, очыни. Фелония Николаевна тиде пашам угыч «ылыжтен», тудлан у шӱлышым пуртен. Уке гын, илен-толын, ты кундемысе тошто тӱрым ыштыме паша чылт мондалтеш ыле.

Уста кидмастарын ончерыштыже шарпаным, кыдал ӱштым, сӱан вургемым, ӱдырамаш ден пӧръеҥ чиемым ожнысо семын тӱрлен ыштыме. Чаманен каласаш кӱлеш, кызыт кидмастар-влак шукыжым ӱдырамаш вургемым ямдылат, а тошто семын ургымо пӧръеҥ тувырым верешташ пеш неле.  Чынжымак каласаш гын, тоштерлаште аралалтшыжат жап эртыме семын пыта, сандене экспонат-влакым уэмденак толман. Фелония Николаевна образецлан Йошкар-Ола ден Козьмодемьянск ола шамычын тоштерыштын фондшышт гыч налеш.

– Курыкмарий калыкнанат шке тӱржӧ уло, тудо угыч «ылыжын», – куанен ойла кидмастар. – Тиде пашам уло кумылын ыштем. Тошто тӱрым тӱткынрак ончалыда гын, шижыда: ожно еҥ-влак могай поро лийыныт! Самырык кидмастар-влакат мондалтше пашаш ушнат, тидланже эшеат куанем.

Мастар ӱдырамашын пашажым ончаш кидмастар, шанчыеҥ, искусствовед, тоштер пашаеҥ-влак толыныт, тыршымыжым кӱкшын акленыт. Тидын деч посна нуно книгам савыктен лукмын кӱлешлыкше нерген палемденыт.

– Фелония Николаевна курыкмарий велысе тошто вургемым уэмден шога, – палемдыш шанчыеҥ Тамара Молотова. ­– Чыла тидым тачысе ончерыште ужына. Курыкмарий тӱрым тӱрлаш пеш неле. Тудо шонанпыл семын ышталтын, шым тӱрлӧ тӱсан, садлан шарпаным «шананвыл» маныныт. Фелония Николаевна шымлызе семын чыла уэмдыме кидпашажым радамыш конден. Ончерыште 200 утла погымо тӱрым ончыктен. Кажнылан шкешотан лӱмым, палым пуэн. Ончер деч вара тугай шижмаш авалта – олыкышто, пеледыш коклаште, улмыла веле чучеш… Теве кузе моторын, тӱс-влакым чын пуртен, кидпаша-шамычым ыштыме. Арам огыл уста кидмастар «Калык верч тыршымаш. Сергей Чавайнын шочмыжлан — 125 ий» шарнымашан медаль дене палемдалтын.

Студент ден самырык кидмастар-шамычлан тоштерыште идалык мучко семинар-практикум ден мастер-класс-влак лийыт.

М.Скобелев

Авторын фотожо

Опубликовать в Одноклассники

Добавить комментарий