Марий йӱла почеш:
4 февраль – Пел теле кече. Теле илян
Астрономический телын рӱдыжӧ. Ожно телын пелыжым рашемден илаш тыршеныт, палаш кӱлын: мыняр курго кодын, мыняр кинде, мыняр пу. Тиде кече марте шапаш гыч пелыже пытен гын, аныклаш тӱҥалыныт. Садлан южо вере тудым эше «Пел кинде кече» манын лӱмденыт.
Кумалтышын чинче тушыжо:
Пазарыш кайыме годым пелештыме мут:
«Вуйӱмбал Юмо, Вуйӱмбал ӧ Вуйӱмбал Серлагыш! Осал тушман деч пыдалза, юмо дене пырля коштыктыза. Ужалаш йӧным ыштыза, серлагышым пуыза! Налшаш сатум шулдештарыза, ужалышаш сатум шергештарыза, осал деч пыдалза, пиалым пуыза.»
Корнышко лекме годым:
«Корно Оза, Корно Кугыза! Ынде тыйын озанлыкышкет лектынна. Поро шонымаш дене тарваненна. Кайыме, толмо корнынам волгалтарен шого. Коштмо корныштына осалымат, осал еҥымат, еҥ осалымат кораҥден шого; трактор, машина дечат арален шого. Сай серлагыш дене коштын савырнаш пӱрен шого. Юмо дене пырля миен толаш сай серлагыш лийже.»
«Кумалтыш мут» книга гыч налме. Йошкар-Ола, 2018 ий.
Черке йӱла почеш:
31 январь – Преподобный Кирилл ден Мария схимонах-влакын, преподобный Сергий Радонежскийын ача-аважын кечышт.
1 февраль – Преподобный Макарий Великийын да Ефессысе святитель Маркын кечышт.
Москван да уло Российын Святейший Патриархше Кириллым троныш шындыме кече.
2 – Преподобный Евфимий Великийын кечыже.
3 – Юмын Аван «Куандарыше» («Отрада или Утешение») юмоҥан кечыже.
6 – Петербургысо поро пиалан Ксения аван кечыже.
Пургыж тылзылан пӧлеклалтеш:
Поран
Йырым-ваш лум веле,
Йырым-ваш тӱтан.
Ах, могае теле –
Ок чарне поран!
Лум йымалне пече,
Лум йымалне пӧрт —
Пургыжта вет кечын
Шучко Теле ӧрт.
Ошкылам лум дене…
Шулдыран мардеж
Ӱштервоштыр дене
Шонышым ӱштеш.
Эм уло мо рӱн деч,
Ий деч пургыж ден?
Нойылдалын шӱм пеш
Йӱштыштӧ илен.
Арала кӧ чоным?
Шӱмым кӧ сакла?
Пор Кече оным
Шӱм пеш сӧрвала.
Ой, поран, мо верчын
Пургыжтет мемнам?
Шыргыжалын, кече
Ончалеш кунам?
Эсен ЭЛАЙ
Пошкырт кундем.
С.Носова ямдылен
