Марий Элын ончычсо финанс министрже деч 10 миллион наре теҥге оксам поген налаш пунчалым луктыныт.
Прокуратурын палдарымыж почеш, ӱмаште ноябрьыште регионын ончычсо финанс министрже Гульфия Габдул-Бариевам должностной полномочий дене утыждене пайдаланымыжлан титкаленыт да кум ийлан условно эрык деч посна кодаш пунчалым луктыныт.
Следствий ден суд рашемденыт: 2015 ийыште тудын кӱштымыж почеш официальный бюджет отчет гыч республиканский адресный инвестиционный программе почеш чоҥымо объектла шотышто кредитор парымын кугытшым кораҥденыт. Тидлан кӧра республикын бюджетшылан 10 миллион наре теҥге эҥгек ышталтын. Штрафым тӱлаш, суд роскотым петыраш да регионын бюджетшылан ыштыме эҥгекшым пӧртылташ 9,7 миллион теҥге оксам тудын деч кӱрын лукташ вараже республикын арбитражный судшо пунчалым луктын. Оксам пӧртылтымашым прокуратур контрольышто кучаш тӱҥалеш.
Л.КАМАЛЕТДИНОВА
