Марий Элысе техникум ден колледжын преподавательже ден студентше-влак специальный военный операцийыште улшо-шамычлан кертмышт семын полшен шогат. Тиде кечылаште нунын кидышт дене ургымо 157 шокшо толстовкым боевой действийын кайыме кундемышкыже колтымо.
Тиде тунемме идалыкын икымше тылзыж гыч октябрь мучаш марте Йошкар-Оласе сервис технологий-влак техникумышто пашам ыштыше да тунемше-влак салтак-шамычлан 80 толстовкым ургеныт. Нунын деч Йошкар-Оласе технологий техникумын студентше-влакат почеш кодын огытыл, ноябрь тӱҥалтышлан шымле утла тыгай вургемым ямдыленыт.
Тиде жапыштак Волжскысо индустриально-технологий да строительно-промышленный техникумлаште салтак-влаклан йымал вургемым ургеныт.
«Ӱшанена, тыгай полыш мемнан тынысым аралыше-влаклан вийым ешара, нелылыкым сеҥаш полша. Тек йӱштӧ игечыште мемнан ямдылыме вургемна нунын капкылыштым веле огыл, шӱм-чоныштым ырыкта!» – маныт туныктышо ден студент-влак.
Вургемым ургымо деч посна Йошкар-Оласе технологий техникумын БД-21, К-11, ЛС-11 группылаште тунемше-влак специальный военный операцийыште улшо-влаклан серышым возеныт. А БАС-11, К-11 группын студентше-влак боец-шамычлан сеткым пидыныт, нашлемникым ямдыленыт, а ЗЧС-22 группын – окоплык сортам.
Тиде кечылаште республикысе техникум ден коледжлаште тунемше-влак Марий Эл Республикын мер полышым пуышо штабыштыже лийыныт, тушто нунылан окоплык сортам ыштыме мастер-классым ончыктеныт.
Г.Кожевникова
Фотом Йошкар-Оласе технологий техникумын соцкылысе лаштыкше гыч налме
