УВЕР ЙОГЫН

Порын шарнен

11 ноябрьыште Йошкар-Олаште верланыше С.Г.Чавайн лӱмеш Национальный книгагудын калыкле литератур залыштыже «Артсег. Владелец вещи, или Онтология субъективности» лӱман кок томан философий трактатын презентацийже лийын.

Тудын авторжо – руш аналитике философ, философий шанче кандидат, тӱнямбал лӱман фотограф, мемнан землякна Сергей Чиликов.

«Артсег» лӱман икымше книгаже Йошкар-Олаште 1993 ийыште савыкталтын.  Тудым варажым тӧрлымӧ, ешартышым, тыгак ойлымаш ден фото-шамычым пуртымо. Чаманен каласыман,  тудым автор ужде кодын: вес ӱмыржӧ кӱрылтын. Книгажым пытартыш кечыж марте Кундыш эҥер воктенее верланыше дачыштыже возен. Икымше томжым Сергей Геннадьевич шкеак возен шуктен гын, кокымшыжым йолташыже, шанчызе Игорь Петрович Карпов ямдылен, но тудат ты пашам мучашлен кертын огыл – илыш дене черверласен. Чылажымат тудын пелашыже Лидия Александровна Охотина ден йолташ-влак мучаш марте шуктеныт.

Вашлиймаште Сергей Чиликов да тудын илыш корныж дене лач тудо палдарен. Книгагудышто Лидия Александровнан полшымыж дене «Сергей Чиликов. Владелец талантов» лӱман стендым чумырымо. Погынышо-влак философын, фотографын творчествыж нерген видеозарисовко-шамычым онченыт. Тыге кум шагат жап шижде писын эртыш.

Палемдыман, Москошто тений 22 ноябрьыште «Фото-ТОП портрет 2023» фестивальыште  «Галерея классических фотографий» ончер почылтеш. Тушто Сергей Чиликовын да Российысе моло уста фотограф-влакын пашаштым пуртымо.

 

М.СКОБЕЛЕВ

Опубликовать в Одноклассники

Добавить комментарий