Ялыште илыш эшеат саемшаш
Марий Эл Вуйлатыше Юрий Зайцев Правительствын пунчалешыже кидпалыжым пыштен. Тудын дене келшышын, регионысо 50 тӱжем марте еҥан илемлашке пашам ышташ кайыше тӱвра пашаеҥлан ик гана 1 миллион наре теҥгем тӱлаш тӱҥалыт. Тиде Россий Президентын кӱштымшыжым шуктымо кышкарыште 2025 ий гыч илышыш шыҥдаралташ тӱҥалше «Земский культур пашаеҥ» федеральный программын ужашыже лиеш.
Программе кызыт улшо «Земский туныктышо» да «Земский доктор» семынак культур специалист-влакым ял шотан илемлашке, пашазе посёлкылашке да изи олалашке каяш кумылаҥдышаш. Роскотым петыраш регион-влак федеральный бюджет гыч субсидийым налаш тӱҥалыт.
«30 процент утла калыкше ялыште илыман Марий Эллан кугыжанышым вуйлатышын тӱҥалтышыже пеш кугу полыш. Ме чолган чоҥена да корно ден образовательный учрежденийлам олмыктена, кинозал-влакым почына, библиотеке-шамычым, тӱвыра пӧртым уэмдена, общественный кумдыклам тӱзатена. «Земский тӱвыра пашаеҥ» программе отрасльышке кадрым утларак кондаш, самырык специалист-влаклан полшаш, мӱндыр яллаште илышым утларак оҥайым ышташ йӧным пуа», – палемден Юрий Зайцев.
Марий Эл вуйлатышын пресс-службыжын уверже негызеш Евгений Садовин ямдылен.
Д.Речкинын фотожо.
