Марий Элыште «Кугу перемен» толкыныш ушнышо-влакын слётышт эртаралташ тӱҥалеш. Тыгай темлымашым республикым вуйлатышын обязанностьшым жаплан шуктышо Юрий Зайцев дек Йоча да самырык-влакын усталык полатыштышт лиймыж годым у толкынын активистше-влак ыштеныт.
«Слётым, мутат уке, эртараш кӱлеш. Шыжым, чыланат каникул гыч пӧртылмеке, эртараш темлем. Тендан шонымашдам сайлан шотлена, меат уло кумылын ушнена. Пырля лийман», – каласен Юрий Зайцев.
Марий Эл гыч школьник ден студент-влак «Кугу перемен» всероссийский конкурсышто ик гана веле огыл финалист да сеҥыше-влак радамыш логалыныт, кугу окса премийым налыныт. Мутлан, кодшо ийын Йошкар-Оласе сервиз технологий техникумын студенткыже сеҥышыш лектын, тудлан 1 миллион теҥге премийым кучыктеныт. Тиде окса дене тудо шкенжын бизнес пашажым тӱҥалаш палемден.
Талантан да шке шонымашкышт шуаш тыршыше йоча да подростко-влак тӱткыш деч посна кодшаш огытыл, стартым налмаште кучем нунылан ончыкыжымат полшаш тӱҥалеш, палемден Юрий Зайцев.
Тудо Йоча да самырык-влакын полатыштын пашаж дене палыме лийын, йоча-влак дене кутыралтен, шанче лабораторийын улшо йӧнжым, робототехнике да мультипликаций дене йоча-влакын сеҥымашыштым ончалын.
Республикын Образований да науко министрже Лариса Ревуцкая «Образований» национальный проект кышкарысе «Кажне йочан успехше» федерал проект ешартыш образований системым кӱлынак вияҥдаш, оборудований-влакым налаш, шукырак йоча-влакым нунын кумылышт шупшмо почеш занятийлашке ушаш у направлений-влакым почаш йӧным пуымыж нерген ойлен.
Марий Эл вуйлатышын обязанностьшым жаплан шуктышо Ю.В.Зайцев мультимедий студийын тунемшыжлан интервьюм пуэн, республикысе икшыве-влакым Йочам аралыме кече дене саламлен да нунылан чылам палаш тыршыше, нелылык деч лӱддымӧ лияш, келшыше сомылым шукташ тыланен.
«Нигунам вуйым сакыман огыл, эре ончык гына кайыман. Чолга улмыдам ужын, раш коеш: тендан ончыкылыкда кумда. Чыла йоча да подростко-влаклан вияҥаш, шинчымаш верч тыршаш тыланем, тунам чыла сай лиеш», – каласен Юрий Зайцев. Ешартыш образований программе-влак дене шукырак йочам авалташ, образовательный организацийлаште у паша верым почаш – тыгай задачым шынден Ю.Зайцев ончен савырнымыж деч вара.
Л.СЕМЕНОВА
