Марий Элысе Мер эскерымаш штаб шушаш сайлымашлан ямде.
Тидын нерген шке МАХ каналыштыже штабым вуйлатыше Евгений Кузнецов увертарен.
Тергыме системым республикысе Мер палатын тӱҥалтышыж почеш Независимый мер мониторинг (НОМ) ассоциацийын полшымыж дене ыштыме. Регионышто шушаш сайлымаш кампаний Кугыжаныш Думын депутатше-влак гыч тӱҥалын муниципальный совет марте авалта.
Йӱклымаш республик мучко 500 наре сайлыме участкыште эрташ тӱҥалеш, кажныштыже эрыкан (независимый) эскерыше-влак лийыт. Штаб 1200 утла мер эскерышым ямдылен. Нунын пашаштым территориальный куратор-влак виктарен шогат. Эскерыше-влакын составыштым рашемдыме да 18, 19 да 20 сентябрьлан дежурство графикым ямдылыме.
Мер эскерымаш рӱдер йӱклымӧ кум кече жапыште сутка мучко пашам ышташ тӱҥалеш. Тушто видеоэскерымаш системе УИК дене ушна, «шокшо линийыш» йыҥгырташ лиеш, пурышо уверым эксперт-влак аклат.
«Ямдылалтме чыла этап мучашлалтын. Профессионал мер эскерымаш Марий Элын кажне избирательный участкыштыже шукталтеш. Ты эскерымаш сайлымаш чын да закон дене келшышыш эрташ полша манын ӱшанем», – каласен Евгений Кузнецов.
Штабын «шокшо линийже». : +7 8362-42-40-27, +7 (961) 373-46-39.
