«Поянлык» шомакым кажныже шке семынже умыла да кажныжын тудо – тӱрлӧ.
Мария Соловьёва, Марий Эл культурын сулло пашаеҥже, РФ правительствын «Душа России» премийжын лауреатше:
– Поянлык – ару, волгыдо, тыматле, поро шӱм-чонан айдемын поро пашаже.
Эльвира Лисицына, Марий Элын калык артистше:
– Поянлык тиде шийвундо огыл. Айдеме чонжо дене поян лийшаш, икте-весе коклаште умылымаш, йӧратымаш, пагалымаш ик эн тӱҥ верыш лекшаш. Илышыште чоным тӱрлӧ семын пойдараш лиеш, утларакше, мутат уке – поро паша дене.
Роман Алексеев, М.Шкетан лӱмеш Марий национальный драме театрын тӱҥ режиссёржо, Марий Элын калык артистше:
– Поянлык тиде – жап, тудо уло гын, эрыкан улат, уке гын – нужна.
Ильгис Гайсин, Татарстан культурын сулло пашаеҥже, республикысе Татар тӱвыра рӱдер вуйлатыше:
– Лишыл еҥем-влакын да родо-тукымемын таза улмышт. Поянлык – шӱм-чон ласкалык.
Светлана Яндукова, мурызо, Самырык-влаклан Олык Ипай лӱмеш кугыжаныш премийын лауреатше:
– Тиде шомакым, чынжымак, кажныже шке семынже умыла: иктылан тудо – коттедж але автомашина, весылан – банкыште кугу счёт, а кумшылан – улан илыш… А мылам поянлык тиде – пеленем улшо лишыл еҥем, икшывем, йолташем-влак, родо-тукымем. Поянлык тиде – йӧратымаш, мыйын илыме тӱням…
Эльвира Токташева, мурызо, Самырык-влаклан Олык Ипай лӱмеш кугыжаныш премийын лауреатше:
– Поянлык тиде – кугу да таза еш.
Надежда Васканова, мурызо:
– Тачысе саманыште поянлыклан тазалыкым шотлыман. Таза улат гын, пашаштат, мӧҥгыштат чыла сай лиеш. Тазалыкым оксала налаш ок лий. «Таза – поян», – маныт калыкыште. Илышыштем эн кугу поянлыкем – йӧратыме ныл икшывем. Нунын пелен мый илем, чонем куандарем. Кажне эрдене помыжалтын, у кечылан тауштен, сайым да порым тыланен, я пашашке, я школышко ужатен колтем. Нуно таза да пиалан улыт гын, тугеже мыят пиалан да поян улам.
А.БАЙКОВА
