Геннадий Сабанцев
Российыште «Йылмын арт-резиденцийже. Мутын семже» («Языковая арт-резиденция.Музыка слова») социально кӱлешан сылнымут проект ышта. Тудо самырык литератор-влаклан пӧлеклалтын. Проектым активист-влакдене иквереш Культур инициативе шотышто Президент фондын полшымыж дене Национальный вашкыл шотышто ресурс рӱдер илышыш шыҥдара. Ты пашам шуктышо Эксперт Каҥаш уло, тудын ик членже – марий поэт, «Ончыко журналын тӱҥ редакторжо Игорь Попов.
– Тиде проект нерген мый Финн-угор писатель-влакын кокымшо конференцийыштышт 2024 ийыште пален налынам, – рашемда Игорь Геннадьевич. – Ханты-Мансийск олаште тудын участникше-влак индеш тӱрлӧ йылме дене ямдылыме «Родное» сборник дене палдареныт, книгам да видеоклип-шамычым ончыктеныт. Саде видеошто проектын финалистше-влак шке возымо сылнымутыштым мотор мурсем почеш лудыныт. Йӱкымат, видеорадамымат профессионал кӱкшытыштӧ ыштыме, лудмо текстыштат кӱкшӧ сылнымутын йодмыжлан келшен толын. «Самырык-влакым литератур да шочмо йылме дек сымыстараш сай йӧн, – шоналтышым тунам. – Мыланнат тыгай йӧным кучылташ кӱлеш». Сеҥыше индеш еҥ кокла гыч тушто мемнан марий поэтессына Виктория Матвеева лийын. Тидыжат куандарыш.
Мый паленам, Арт-резиденций дене пеҥгыде кылым тыгак поэтессе йолташна Алёна Яковлева куча. Ондакысе сеҥыше-влакын произведенийыштым ме туддене марлаш кусараш да «Ончыко» журналыш савыкташ кутырен келшенна. А тений лачак тудо мыйымат проектыш ушнаш ӱжӧ – эксперт семын.
Тений проектыш ушнаш чылаже 61 йодмаш пурен. Нуным кок шӧрынын аклена: возымо мастарлыкыштым да, возымышт дене палдарен, калык ончылно выступатлен моштымыштым. Кудло ик автор коклаште тӱрлыжат уло: иктышт сайынрак лудын моштат, весышт уданрак, но сылнымутым моло деч утларак шижыт. Тӱҥжӧ – нуно чыланат шке шочмо йылмыштым йӧратат, тудым аралышаш да вияҥдышаш верч тыршат. Сеҥышыш лу еҥ гына лектеш гынат, кажныже мемнан элысе литературым вияҥдымашке шке надыржым мыняр-гынат пыштен шукта.
Икте гына тургыжланаш амалым луктеш: тиде гана марий автор-влак кокла гыч иктат йодмашым колтен огыл. А вет ме чумыр финн-угор серызе тӱняште кӱкшын аклалтына. Ончыкыжымат тиде чапнам волтымо огеш шу ыле. Сандене вес корнын тыгай проект-влаклан утларак тӱткышым ойыраш возеш.
«Ончыкылык эреак у технологий дене кылдалтеш, у технологий – эрласе кечын негызше, – ешара Игорь Геннадьевич. – Айдеме книгам налже да лудаш почшо манын, ты книга тудлан келшен шичшаш. Арт-резиденцийыште книга-сатум чын профессионал-влак ямдылат. Тудын тӱҥ ойыртемже – шочмо йылме тачысе пагытлан келшен йоҥгалтше манын тыршымаш. Самырык тукымлан тидыже эн чот кӱлешан. Тыге гына шочмо йылме тошто пагытеш киен кодшо йылме огыл, а тачысе культурын чот кӱлешан ужашыже лиеш».
Снимкыште: Поэт Игорь Попов.
Фотом «Марий Эл» газет редакцийын архивше гыч налме.
