Россий Федераций Президентын Юл кундем федеральный округысо полномочный представительже Игорь Комаров «Россий» выставке-форумлан Марий Эл Республикын сайын ямдылалтмыжым да экономикым, IT сферым, туризмым вияҥдымаште регионын кугу вий-куатше улмым палемден. Чыла тидыже стендыште раш ончыкталтын манын.
Марий Элын экспозицийже 7 кече жапыште тӱрлӧ тематике дене пашам ышта, тушто IT, туризм, молодёжь да йоча жап арня-влак эрташ тӱҥалыт, палемден Россий Правительстве Председательын алмаштышыже Дмитрий Чернышенко.
«Стенд традиционный калык шӱлышан стилистике дене келшышын ямдылалтын, тудо уна-влаклан кундемын историйже, Йошкар-Олан вияҥын толмыж нерген каласкала. Тушто тыгак сай качестван да экологий велым аклымаште яндар шӧр продукцийым тамлен ончаш лиеш»,– палемден вице-премьер.
Субъектын туристический вий-куатше кугу. Тушко турист семын миен коштшо пытартыш ийлаште кок пачаш наре ешаралтын. Марий Элыште «Туризм да унам вашлийме индустрий» нацпроект кышкарыште турист-влакым вераҥдыме капитальный огыл модульный объект-влакым чоҥымо шотышто 4 инвестпроект шукталтеш манын палемден Дмитрий Чернышенко.
«Республик национальный статусым налше «Пеш кугу Юл корно» туристический маршрутыш пурталтын. Мутат уке, Йошкар-Ола чапле ола, тудо селфи-туризмлан келшен толшо лу эн сай ола радамыш пурен, а Юринысе Шереметев замок – элыште эн оҥай вич усадьбе-парк радамыш», ешарен вице-премьер.
Россий Президентын Юл кундем федеральный округысо полномочный представительже Игорь Комаров тыге палемден: «Россий» тӱнямбал выставке-форум – пеш кугу проект, тушто элын пеш кугу сеҥымашыже-влакым иктыш чумырен ончыктымо.
«Таче выставкыште Марий Эл Республик ончыкталтеш. Регион промышленный комплексше да виян ялозанлык переработкыж дене ойыртемалтеш. Марий Элын промышленный предприятийже-влак пеш точный механизм-влакым, электрический ден йӱкшыктарыше оборудованийым лукмаште, металлым обрабатыватлымаште ончылно каят. Республик информационный технологий, научно-образовательный сферылаштат сеҥымашке шуын толеш. Республикын рӱдолаже Йошкар-Олат ӧрыктара, тудын ушеш кодшо оҥай архитектурыжо тӱрист-влакым шкеж дек шупшеш»,– каласен Игорь Комаров.
Федераций Совет Председательын алмаштышыже Константин Косачев тушто пашам ыштыме ийлаште Марий Эл мыланем шочмо кундемыш савырнен манын палемден. Вараже тудо йӧн лекме годым республикыш миен кошташак тыршем манын ешарен.
«Республик моторлыкшо, шкешотан культуржо, йӱлаж дене эреак ӧрыктара. Тиде регионын чыла сеҥымашыже, ойыртемже нерген каласкалаш арнят огеш сите. Кӧ Марий Элыште лийын огыл гын, тиде чапле республикыш миен савырнаш темлем. «Россий» выставкыш пагален ӱжына»,– каласен Константин Косачев.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
