Илалше ийготан еҥ ден инвалид-влакым кужу жап ончымо системе Марий Элын чыла районыштыжо пашам ышташ тӱҥалеш.
Кызыт тудым кок ола округышто: Йошкар-Олаште да Волжскышто да кум муниципальный образованийыште: Звенигово, Оршанке да Юрино районлаште пилотный проект семын илышыш пуртымо. Шушаш ий гыч тушко республикнан чыла районжым ушат, увертарен эртыше оперативный совещанийыште регионын калык илышым саемдыме шотышто министрже Марина Островская Марий Элым вуйлатышын пашажым жаплан шуктышо Юрий Зайцевлан.
Палемдыме проектын кышкарыштыже калыкым социально обслуживатлыме комплексный рӱдер-влак пелен ончышо (сиделке)-влакын службыштым ыштыме. Тудо ончымо шотышто икмыняр социальный услугым пуа, мутлан, кочкаш ямдыла да пукша, мушкеш, вургемым вашталта, тазалыкым эскера, медикын палемдымыжым шукта. Социальный пакетыш пуртымо услугым ыштыме радамыште чылаже 50 тӱрлӧ услуго шотлалтеш. Чыла тиде граждан-влаклан яра пуалтеш.
Таче ончышо-влакын услугышт дене шке илыме верлаште 200 да стационарлаште 100 еҥым авалтыме.
2023 ий нерген ойлаш гын, кызыт, ончымо шотышто услугылан тӱнен илыше 8651 еҥым авалташ манын, республиклан финансированийын кугытшым шотлат. М.Островскаян мутшо почеш, 4 тӱжем утла у пашаеҥ да социальный обслуживанийын организацийлаштыже 1,5 тӱжем квадрат метр кумдык кӱлыт.
Марий Элым вуйлатышын пашажым жаплан шуктышо Ю.Зайцев республикнан Калык илышым саемдыме шотышто министерствыжлан илалше ийготан граждан ден инвалид-влакым кужу жап ончымо системым илышыш пуртымо пашам умбакыже шукташ кӱштен да тудын нине еҥлан социальный ден медицине полышым писынрак пуаш йӧным ыштымыжым палемден. Кужу жап ончымо системе илалше еҥ ден инвалид-влаклан полышым мӧҥгыштак налаш йӧным ышта, а тидыже медицине тӧнеж-шамычын пашаштым мыняр-гынат шагалемда.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
