Морко муниципал район администрацийым Александр Голубков вуйлата.
20 ноябрьыште Морко муниципал район депутат-влак погынымашын черетдыме кумшо сессийже эртен. Повесткыште ик йодыш лийын: район администраций вуйлатышым сайлымаш.
Сессийын пашашкыже Марий Эл Кугыжаныш Погын председатель Михаил Васютин, Кугыжаныш Погынын депутатше-влак Наталья Пушкина ден Эдуард Иманаев, Марий Эл правительстве председательын икымше алмаштышыже Евгений Курмаев, Марий Эл элгӧргӧ политике, верысе самоуправлений вияҥдымаш да юстиций министр Антон Мирбадалев, тыгак илем поселений администраций да районысо администрацийын пӧлкалажым вуйлатыше, СМИ пашаеҥ-влак ушненыт.
Конкурсыш кок еҥ шке кандидатурыжым темлен: тиде Морко администраций вуйлатышын пашажым жаплан шуктышо Александр Голубков да Октябрьский ялсовет администрацийым вуйлатыше Артур Микша. Депутат-влак ик йӱкын Александр Голубковым сайленыт.
Александр Николаевичын вуйлатыме пашаште кугу опытшо погынен, районышто экономике да социальный йодыш-влакым кӱлеш семын решатлаш тӱҥалеш манын ӱшанена, палемденыт саламлымышт годым Михаил Васютин, Евгений Курмаев да районысо депутат-влак погынымашым вуйлатыше Гарафий Хуснутдинов.
Кугыжаныш Погынын депутатше, министр-влак М.Янтемир лӱмеш литератур-этнографий тоштерыште, «полимер Лимитед» производственный компанийыште лийыныт.
Лидия СЕМЕНОВА
Фотом Марий Эл Кугыжаныш Погынын соцкыл тӱшкаж гыч налме
