ОНФ-ын Марий Эл Республикысе региональный пӧлкажын СМИ-влак дене пашам ыштыше координаторжо Ольга Кузьминан увертарымыж почеш, Калык фронт Шодыгол посёлкышто водозаборан вӱд пучым жапыштыже чоҥен шуктыдымо шотышто Марий Элын прокуратурышкыжо вуйшиймашым пуэн.
Юрино районысо Шодыгол (Юркино) посёлкышто подрядчик пашам вӱд пучым чоҥымо нерген ойпидышыште ончыктымо жап дене келшышын огеш шукто. Объект «Яндар вӱд» федеральный проектын «Илыме вер да оласе йырвел» национальный проектше кӱшеш чоҥалтеш. Тудын чумыр суммыжо – 25 миллион теҥге. Президент толкынын Марий Элысе еҥже-шамыч ситуацийым рашемдыме йодыш дене прокуратурыш лектыныт.
Ойпидыш почеш, объект 2023 ий 31 март деч ончычак пашам ышташ тӱҥалшаш улмаш. Но кызыт тыште йӧршын вес сӱрет: пучым оптен пытарыме огыл, рӱдӧ уремлаште канаве ден тавылам чыла вережак огыл петырыме, кумдыкымат тӱзатыме огыл…
«Застройщикын чыла пашам палемдыме жап деч почеш кодын шуктымыж нерген вуйшиймаш верысе калык деч ӱмаште декабрьыштак пурен. Тунам объектыш эксперт-шамыч дене пырля миен коштна да Юрино районын администрацийжылан подрядчикын пашам жапыштыже шуктымыжым эскераш темленна. Вӱдыш ончымо гай лекте: вӱд пуч эшеат пашам огеш ыште. Сандене прокуратурыш эскерыме мере-влакым шуктымо йодыш дене лекна», – манеш Марий Элысе Калык фронтын исполкомжын вуйлатышыже Надежда Ефремова.
М.ИВАНОВА ямдылен
ОНФ-ын Марий Эл Республикысе региональный пӧлкажын фотожо
