Таир ер серыште верланыше «Журавушка» рӱдерыште специальный военный операцийыште участвоватлыше сарзе-влакын йочаштлан тазалыкым пеҥгыдемдыме сменым организоватлыме.
Ийготыш шудымо-влаклан «Журавушка» социально-реабилитационный рӱдерыште 31 май гыч 13 июнь марте 7-17 ияш 170 еҥ, ты чот гыч 150 йочаже – СВО участник-шамычын ешышт гыч, канен.
11 июньышто рӱдерыш Марий Элым вуйлатыше Юрий Зайцев ӱдыр-рвезе-влакым Российын кечыж дене саламлаш миен.
«Тиде кугыжаныш пайрем элнан эрыкшым ончыкта, кугезына-шамычын лӱддымӧ лиймыштым ушештара, шочмо элым йӧратыше да тудын историйжым аклыше-влакым иктыш уша. Элнам аралыше, тушман ваштареш кредалмаште патырлыкым ончыктышо ача-аваланда тауштем. Ме нине герой-влак дене кугешнена да Сеҥымашым гына тыланена», – палемден регионым вуйлатыше да йоча-шамычлан пеҥгыде тазалыкым, пайдале каникулым, сай кумылым тыланен.
Сменылан «Семь Я или Секрет успеха» программым ямдылыме, тудо Ешын идалыкшылан пӧлеклалтын да кажне йочан усталыкшым вияҥдымашке виктаралтын. Программыш фотопроект, видеопроект, виртуальный газет проект, кинопроект, бизнес проект гай мероприятий-влакым пуртымо.
Тений кеҥежым «Журавушка» рӱдерыште куд сменым эртараш, тыгодым тӱжем утла йочалан, ты шотыштак неле илыш ситуацийыш логалше, ЛНР, ДНР, Запорожье гыч толшо 510 икшывылан, канаш да тазалыкым пеҥгыдемдаш чыла йӧным ышташ палемдыме.
15-28 июньышто инклюзивный смене лиеш. 31 июль гыч 13 август марте Запорожье гыч 90 йочам налыт. 15-28 августышто профилактический учётышто шогышо ӱдыр-рвезе-влаклан специализироватлыме сменым организоватлат.
Марий Элым вуйлатышын пресс-службыжын уверже негызеш М.ИВАНОВА ямдылен
