1 июньышто, Йоча-влакым аралыме тӱнямбал кечын, Марий Эл Республикым вуйлатыше Юрий Зайцев «Марий кеҥеж Движение Первых дене пырля» фестивальым почын.
«Йоча-влак, таче тендан пайремда. Ме, кугыеҥ-влак, эре пеленда улына. Тыланда йӧсӧ гын, те ойгыралтен колтеда але кумылда вола – ача-авада, воспитатель да туныктышыда-влак эреак полшаш да, мутлан, тачысе гай чапле пайремым ышташ эре ямде улыт. Мый тендам саламлем. Ӱжмыланда моткоч куаненам. Кугу, таза, шкендан Родиным – кумда Российым – йӧратыше кушса, – саламлен ойлен Юрий Зайцев.
Марий Эл вуйлатыше Каныме да тӱвыра рӱдӧ паркын аллейже мучко социальный ярмиҥгам, йоча-влакын ыштыме кидпаша арверыштым ончал эртен. Тыгак мастер-класс-влакым эртарыман площадкылаште, моло аттрационлаште лийын.
«Марий кеҥеж Движение Первых дене пырля» фестиваль «Марий Эл – тыршымашын да тыршыше еҥ-влакын кумдыкышт» толкынын регионысо пӧлкажын илышыш шыҥдарыме проектшын ик йыжыҥжылан шотлалтеш. Тудо Педагогын да наставникын идалыкшылан пӧлеклалтеш.
Фестиваль кеҥеж мучко гӱжлаш тӱҥалеш. Районлаште, тӱшка верлаште, кудывечылаште! Арнялан ик гана усталык мастер-класс, интерактивный квест-путешествий, турист программе, уш-акылым тергыше квиз, концерт, модыш, спорт эстафете-влак эртаралтыт– икманаш, йоча-влакым оҥай да пайдале каныш вуча. Российысе «Движение Первых» радамыште улшо ӱдыр-рвезе-влак коклаште йолташым кычалыда гын, фестивальыш ушныза!
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен
Д.Речкинын фотожо
