Марий Элын тазалык аралтыш министрже Марина Панькова Запорожский область гыч пӧртылшӧ медик-влакын бригадыштлан таумут ден чапкагазым кучыктен.
Йошкар-Олаште Марий Эл Тазалык аралтыш министерствын, медицине организацийлан, страховой медицине компанийлан да ОМС-ын территориальный фондшын вуйлатышыже-шамыч коклаште совещаний эртен. Тудо торжественный тат дене тӱҥалын – тазалык аралтыш министр М.Панькова Запорожский областьыште илыше калыклан профосмотрым эртарыме командировко гыч пӧртылшӧ медик-влаклан: Медведево районысо Краснооктябрьский врачебный амбулаторийын терапевтше Дмитрий Лебедевлан, Йошкар-Оласе городской больницын кардиологшо Дмитрий Онучинлан, Йоча республиканский клинический больницын неврологшо Замзания Сафуковалан да Параньга районысо рӱдӧ больницын фельдшерже Жанна Даутовалан – ведомствын наградыже-шамычым кучыктен.
Совещанийын участникше-шамыч тыгак Перинатальный рӱдерын акушеркыже Ирина Чеботаревам саламленыт. Тудо Профессиональный мастарлыкым ончыктымо всероссийский конкурсышто кокымшо верым налын.
М.ИВАНОВА
Марий Эл Тазалык аралтыш министерствын фотожо
