Юрино районышто илыше 6 тӱжем утла еҥ у поликлиникыште сай медицине полыш дене пайдаланаш тӱҥалеш.
11 мартыште Марий Элым вуйлатыше Юрий Зайцев Козьмодемьянск район-влак кокласе больницын Юрино районысо больницыжын поликлинике отделенийжым видеоконференций режимыште почын.
Тылеч ончычсо поликлинике 1906 ийыште чоҥымо зданийыште верланен. Кумдык ситыдымылан кӧра кабинет-влакын ужашышт моло зданий ден помещенийыште лийыныт. 2015 ийыште райрӱдыштӧ у больницым чоҥеныт, да стационарыште эмлалтме йӧн шукылан саемын. Районышто илыше калык пациент-влакым поликлиникыштат приниматлыме йӧнын саеммыжым вучен.
«У поликлиникыште кызытсе оборудованийым шындыме. Ынде Юрино районышто илыше-шамыч йӧнан условийыште тичмаш медицине полышым налын кертыт. Российын президентше Владимир Владимирович Путин здравоохраненийын первичный звеножым модернизироватлыме программым шуйымо нерген увертарен да ял ден села-влаклан посна тӱткышым ойыраш кӱлмым палемден. Ме районысо калык ончылно обязательствынам шуктенна. Пашам пырля ыштымыланда тау», – манын Ю.Зайцев.
Поликлиникым «Здравоохранений» национальный проектын «Здравоохраненийын первичный звеножым модернизироватлымаш» регионысо проектшым илышыш пуртымо кышкарыште чоҥымо. У медицине рӱдерын полышыжлан 6 тӱжем утла еҥ, ты шотыштак 1 тӱжем йоча, эҥертен кертеш. Поликлиникын обслуживатлыме кумдыкыштыжо 42 илем верланен.
Медицине тӧнежыште врач-влаклан, эмлыме да диагностикым ыштыме кабинет-влакым почмо, 11,8 миллион теҥгеаш оборудований ден мебельым шындыме.
Регионын правительствыже медицине пашаеҥ-влаклан полшымо шотышто тӱткышым ойыра. Кадр ситыдыме йодышым решатлышашлан поликлиникыш пашаш пурышо фельдшерлан республикын бюджетше гыч ик гана тӱлыман выплатым ешарен пуа. Медицине персоналлан служебный илыме верым ситарыме йодышат лончылалтеш.
Поликлинике медицине пашам шукташ лицензийым налын да пациентше-шамычым вуча.
Марий Элым вуйлатышын пресс-службыжын уверже негызеш М.ИВАНОВА ямдылен
