Юрий Зайцев почто пашаеҥ-влакым профессиональный пайремышт дене саламлен.
12 июльышто Марий Элым вуйлатыше почто пашаеҥ-шамычым шушаш профессиональный пайремышт дене саламлен да отрасльыште сай велым ойыртемалтше специалист-влаклан Чапкагаз ден Тауштымо серышлам кучыктен. Торжественный мероприятий Республиканский курчак театрыште эртен.
Таче регионыштына почто кылын 257 пӧлкаже пашам ышта, тушто 1704 специалист тырша. Ӱмаште «Российын почтыжо» АО-н филиалжын пашаеҥже-влак калыклан 8,8 миллион письма ден бандерольым, 400 тӱжем посылке ден тыгыде пакетым, 5,9 миллион экземпляр газет ден журналым кондыштареныт.
«Почто кыл пашаеҥ-влакын ик йогыныш пуртымо да ваш кутырен келшен шуктымо пашашт дене серыш ден посылке, пенсий ден пособий, савыктыме изданий-влак ден кочкыш продуктым адресат деке жапыштыже конден шуктымо йӧн кылдалтын. Таче Россий Федераций президент Владимир Владимирович Путинын кӱштымыж дене элнан почто службыжо модернизироватлалтеш. Марий Элыште нылле утла пӧлкам уэмдыме, калыклан у сервис-шамыч илышыш пурталтыт. Компаний почто деч посна кугыжаныш ден социальный услуго-шамычымат ышта», – мероприятийыш погынышо-влаклан манын Ю.Зайцев.
Республикым вуйлатыше «Российын почтыжо» АО-н пашажым специальный военный операцийыште участвоватлыше-влаклан почто кыл услугым ыштыме шотыштат палемден. Компаний сарзе-шамычын родышт ден лишыл еҥыштлан тӱрлӧ посылкым яра колташ йӧным ыштен.
Юрий Зайцев почто кыл пашаеҥ-влаклан пашам сайын да шкем чаманыде шуктымыштлан тауштен да награде-шамычым кучыктен.
Марий Эл правительствын Чапкагазше дене Шернур почтамт Йӱледӱр почто кылын ялысе пӧлкажын начальникше Маргарита Никонова палемдалтын.
Марий Элым вуйлатышын Тауштымашыжым Морко почтамт Мариец почто кылын ялысе пӧлкажын начальникше Ляйсан Ахмадиевалан, Волжский почтамт Мочалище почто кылын ялысе пӧлкажын начальникше Ирина Калининалан, Морко почтамт начальникын алмаштышыже Любовь Кучеровалан, Шернур почтамт Кугу Лаждӱр почто кылын ялысе пӧлкажын 2-шо классан почтальонжо Таисия Соколовалан увертарыме.
Марий Элым вуйлатышын пресс-службыжын уверже негызеш М.ИВАНОВА ямдылен
