ЙОШКАР-ОЛА Кучемыште УВЕР ЙОГЫН

У автовокзал: корныда пиалан лийже!

Йошкар-Оласе у автовокзалым жапыштыже чоҥен шуктымо: генеральный подрядчик объектшым сдатлен.

Шочмын 8 шагатлан Марий Эл вуйлатыше Александр Евстифеев у автовокзалыште лийын да чоҥымо пашам сай могырым аклен. «Чоҥымо да монтаж пашам жапыштыже да сай качестваным ыштымыжлан подрядчиклан кугу тау. Кызыт конкурс почеш налме мебельым кондедат, лишыл жапыште тудым веран-верышке вераҥдат. Автовокзал республикым вияҥдыме индивидуальный программе кӱшеш чоҥалтын. Тудо чыла шотыштат кызытсе йодмашлан келыштаралтын. Тыгай проектым Нижний Новгородышто кучылтмо. Чылажат пассажир-влаклан йӧнан лийже манын ышталтын, еҥ-шамычым шупшыктышо-влак дек ик йодмашна уло – автовокзал-влакын уэммыштым ончен, нунылан автобусышт-влакым у дене вашталтыман. Тунам республикыште илыше да унала толшо-влакын автобус дене кудалышташ кумылышт лектеш. У автовокзал мемнан туризм сферыланат кугун полша, молан манаш гын турист-влакын ола мучко ончен коштмо жаплан автобус-влакым шогалташ вер лиеш, автовокзал тыгай шонымаш денат чоҥалтын. Чылалан тау, корныда пиалан лийже», – каласен Александр Евстифеев погынышо калыклан.

Автовокзал шушаш ийын январь гыч пашам тӱҥалеш, рашемден Марий Элын Транспорт да корно озанлыкын министрже Александр Герасименко. Кызыт объектым кадастр учётыш шогалтыме да моло кагаз паша ышталтеш.

Марий Эл вуйлатыше министр ончылан раш задачым шынден: пассажир-влакым шупшыктымо бизнес оза-влаклан раш, а граждан-влаклан лӱдыкшыдымӧ да чыла шотыштат йӧнан лийшаш.

«Кызыт калыкым шупшыктышо-влак коклаште чыланжак оксам кассе гоч огыт пого. У автовокзалым колтымеке, тыгай койыш пытышаш. Но ме умылена, перевозчик-влак оксам ыштен налшаш улыт, бизнесышт парышым кондышаш, сандене кӧ у автовокзалыш толеш, тудын экономикыже пеҥгыдемеш, тыште нимогай кокытеланымаш уке», – ешарен республик вуйлатыше.

Йошкар-Оласе у автовокзал ик пачашан, 850 квадрат метрым айла. Зданийын тӱжвал велымже марий сыным кучылтмо. Вокзал кумдыкышто перрон-влак, мӱндыр олалашке да ола воктене кудалыштше 40 автобусым шогалташ площадке, еҥ-влакын транспортыштлан 26 парковко вер улыт.

 Л.СЕМЕНОВА

Опубликовать в Одноклассники

Добавить комментарий