КУЧЕМЫШТЕ

Шуктымо пашам кӱкшын акленыт

Россий Федерацийын Юл кундем федеральный округысо субъектше-влакын кугыжаныш кучем законодательный органыштын ассоциацийыштын 13 декабрьыште Йошкар-Олаште эртыше LXVI заседанийыштыже РФ президентын Юл кундем федеральный округышто полномочный представительже Игорь Комаров ден регионласе парламентарий-шамыч Марий Элыште «Тӱвыра» национальный проектым илышыш пуртымо пашам кӱкшын акленыт.

Заседанийыште «Тӱвыра» национальный проектын мероприятийже-влакым шуктымо, тыгак общий да профессиональный образований системыште шинчымашым пуымо программе-шамычым илышыш пуртымо йодыш-влакым ончымо.

Тений элна шуко нелылык дене вашлиялтын, сандене регионлаштат, элыштынат мер-политике да социально-экономический пеҥгыдылыкым арален кодышашлан кучем орган-влаклан чолганрак пашам ышташ логалын.

«Законодательный ден исполнительный кучем орган-влакын чыла пашам профессионально шуктымышт дене экономикым пеҥгыдемдыме, граждан-шамычлан, ты шотыштак специальный военный операцийыште участвоватлыше-влаклан да нунын ешыштлан социально полшымо мере-шамыч илышыш жапыштыже пурталтыт. Тидыже еҥ-влакын кучемлан ӱшаныштым арален кодаш, калыкым иктыш чумыраш йӧным ыштен. Тыште Законодательный округын ассоциацийжынат надырже изи огыл. Эртыше ийыште ассоциаций шуко йодышым ончен. Эн кӱлешанже Россий президентын элнам вияҥдаш палемдыме национальный цель-шамычым шуктымо теме дене кылдалтын», – манын И.Комаров.

Республикыштына «Тӱвыра» национальный проектым илышыш пуртымо паша лектыш дене Марий Элым вуйлатыше Юрий Зайцев палдарен.

«Тыгай чапле лектышыш Кугыжаныш Погын дене пашам умылен, вашла кутырен келшен да полшен шуктымылан кӧра шуынна. Регионысо законодатель-влак дене кылым чарныде кучаш, национальный проект-шамычым илышыш пуртымо годым верлаште могай нелылык улмым эн ончычак нунын деч пален налаш да тудым кораҥдыме тӱрлӧ йӧным решатлаш моткоч кӱлешан», – палемден Ю.Зайцев.

Ассоциацийын координаторжо, Нижегородский областьын Законодательный Погынжын председательже Евгений Люлин Марий Элыште «Тӱвыра» национальный проектым илышыш пуртымо пашан кугу кӱкшытыштӧ улмыж нерген ойлен.

«Тыште тӱвырам вияҥдыме полышын кӱкшытшӧ национальный ойыртемым, колоритым, калыкын историйжым арален кодымо гычак коеш. Тидыжым калыкле тоштерыштат, кажне тӱвыра объектыштат ужна. А шканем шуко сайым кӱсынлышым, регион-влакланат уло молан тунемаш, шонем», – манын тудо.

Заседанийыште калыкым тургыжландарыше моло йодышымат онченыт, мутлан, общественный питанийын алкоголь продукцийым ужалыше пунктшо-влакын пашаштым. Нунын пашаштым шотыш кондаш юридический йодмашым палемдаш, субъект-влаклан келшыше пунчалым лукташ полномочийым пуаш темлыме.

Марий Эл Республикым вуйлатышын администрацийжын увер паша пӧлкажын уверже негызеш М.ИВАНОВА ямдылен

 

 

Опубликовать в Одноклассники

Добавить комментарий