Тенийысе у тунемме ийлан Марий Элыште кок у школ почылтын, тыгак капитально олмыктымо деч вара куд общеобразовательный организаций йоча-влаклан уэш шинчымашым пуаш тӱҥалын. Марий Элым вуйлатышын пашажым жаплан шуктышо Юрий Зайцевын эртарыме оперативный совещанийыштыже республикын образований да науко министрже Лариса Ревуцкая школ-влакын у тунемме ийлан ямдылалтме шотышто иктешлымашым ыштен.
Тудын увертарымыж почеш, «Образований» национальный проектын «Кызытсе школ» регионысо проектше почеш Медведево, Марий Турек районлаште кок у школ омсажым почын. «Школ образований системым уэмден вияҥдымаш» федерал программе дене келшышын республикыште куд общеобразовательный организацийым капитально олмыктымо. Тидлан чумыр налмаште 378 миллион теҥгем ойырымо. Тыгак республикын бюджетше кӱшеш 11 районышто верланыше 24 школын леведышыжым капитально уэмдыме. Министр ешарен: общеобразовательный организацийлам у тунемме ийлан ямдылалтме пашалан 679 миллион теҥгем кучылтмо. «Посна тӱткышым лӱдыкшыдымылыклан ойырымо. Тидын могырым 604 объектым тергыме, пожар лӱдыкшыдымылык дене кылдалтше сомыллан 42 миллион утла теҥгем кучылтмо», – каласен Лариса Ревуцкая.
Ялысе, селасе школлаш йоча-влакым чылаже 229 автобус шупшыкташ тӱҥалеш, маршрут-шамыч ямде улыт.
Дошкольный образований шотышто ойлаш гын, Лариса Ревуцкаян мутшо почеш, йочасадыш 8 тӱжем напрвленийым пуымо. Чылаже республикысе школлаште 448 икымше классым чумырымо, тушто чумыр налмаште 9439 ӱдыр-рвезе шинчымашым погаш тӱҥалын. Тунемме ий тӱҥалтышлан туныктымо пашаш 52 самырык педагог ушнен. «Земский туныктышо» федерал программе почеш 8 паша ойпидышым ыштыме.
Украиным, Донецк да Луганск калык республиклам коден кайыше ешлаште кушшо йоча-влакым туныктымо шотышто йодышым Марий Эл Образований да науко министерстве посна контрольышто куча. Кызыт республикыште 35 тыгай икшыве уло. Нунылан йочасадыште, школышто, профессионал образований пуышо организацийыште верым ойырымо.
Марий Элым вуйлатышын жаплан шуктышо Юрий Зайцев школ ден йочасадлаште кадр, тыгак специальный военный операций эртыме кундемла гыч толшо йоча-влаклан образованийым пуымо шотышто йодышым решатлымылан поснак кугу тӱткышым ойыраш кӱштен.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
